|
|
 |
|
| |
Wararka Soomaaliya Isniin
+ Sawiro Oct,20,2008
Wabiga Juba oo cagta Mariyay dhulbeereed ka badan
4-kun oo hegtar.
Oct,20,2008
(Jamaame:Saylac.Com)-Fatahaad Balaaran oo uu
sameeyay wabiga Juba ayaa waxaa uu ku baabi'iyay
dhulbeereed ka badan 4-kun oo hegtar oo ku yaala
gobolka J/hoose.
Deegaano farabadan oo hoos taga degmdada Jamaame ee
gobolka J/hoose ayaa waxaa ku baabay dhulbeereed
gaaraya illaa 4-kun oo hegtar kadib markii
dhulbeereed halkaasi ku yaalay uu cagta mariyay
fatahaad uu wabiga Juba ka geystay halkaasi.
Fatahaada wabiga Juba ayaa sidoo kale waxaa ay
sababtay in uu cagta mariyo dagal u soo go'i rabay
dadka ku dhaqan gobolka J/hoose xili dadkasi ay ka
soo kabanayeen abaaro dabadheeraaday oo wada
saameeyay dadka iyo duunyada halkaasi ku nool.
Dad badan ayaa isaga barakacay dhulka uu wabiga ku
burqaday kadib markii uu cagta mariyay tuulooyin ay
dadkasi ku noolaayeen
Mid ka mid ah waxgaradha degmada Jamaame oo lagu
magacaabo Suldaan Cali Mustaf Max'ed isla markana ka
mid ah dadkii uu wabiga Juba ka baabi'iyay Dalagii
Beeraha ayaa waxaa uu sheegay in wabiga oo si daran
xiligan ugu sii fidayo dhul beereedka ku yaala
halkasi isla markana uu ka baabi'iyay dalag uu
sheegay in xiliga uu sugayay in uu u soo go'ay.
Suldaanka ayaa intaasi ku daray in dad badan oo ka
mid ahaa Beeraleeyda gobolka J/hoose gaar ahaan kuwa
ku dhow dhow wabiga Juba ay isaga barakacayaan
deeganadooda kadib markii uu soo batay burqashada
Wabiga Juba uu ka geysanayo halkaasi.
Gudaha Degmada Jamaan ayaa waxaa ay noqotay mid
haawaneeysa kadib markii roobab xoogan iyo Fatahaad
ka dhashay wabiga Juba uu buux dhaafiyay degmadaasi
waxana inta badan degmadasi ku xirmay goobihii
ganacsi eek u yaalay iyadoo dadku ay yihiin kuwa
intooda badan ku go'doonsan xaafadahooda halka inta
kale ay horay uga sii barakeceen.
Xiligan oo kale marka ay roobabka ka ay da'aan
gobolada Dalka Gaar ahaan deegaanada ay maraan
labada Wabi ee Juba iyo Shabelle ayaa waxaa ay inta
badan keenaan Dhibaatooyin ka dhashay fatahaado ay
sameeyaan taasina ay keento in ay dhibaato dhanka
nolosha ah.
Xaalada Degmada Balcad oo saakay degan iyo
Saraakiil ka kala tirsan Maxkamadaha iyo Shabaabka
oo ku qul qulaya.
(Balacad:Saylac.Com)-Kadib Iska hor imaad shalay
xoogaga Al shabaab iyo Maleeshiyo Gacan Saar la leh
Maxkamadaha Islaamiga dhex maray aya Xaalada Degmada
Balcad ee Gobolka Sh/Dhexe waxaa ay tahay mid degan.
Jawiga Magaalada ayaa guud ahaan caadi ah, waxaana
furan goobaha ganacsiga iyo dhaq dhaqaaqa gaadiidka,
waxaana ardayda iskuulada ay saakay u dareereen
goobahooda waxbarasho.
Inkastoo Magaalada ay saameyn ku yeelatay iska hor
imaadkii shalay dhex maray Xoogaga Alshabaab iyo
dhalinyaro deegaanka ah oo gacan saar la leh
Maxkamadaha ayaa hadana waxaa dhinac ka soconaya
dadaalo lagu qaboojinayo xiisadaas.
Wararka aanu ka heleyno Magaalada Balcad ayaa
sheegaya in Saraakiil ka kala tirsan Maxkamadaha iyo
Shabaab ay ku qul qulayaan Magaalada, kuwaasoo sida
la sheegay gacan ka geysanaya xalinta xiisada ka
jirta Balcad.
Sidoo kale Odayaasha Deegaanka ayaa dhankooda wada
dadaalo ay ku qaboojinayaan xiisadaas, waxaana la
ogeyn waxa ay ku dambeyn doonto xiisada, iyadoona ay
degmada ku wada sugan yihiin Labadii dhinac ee
shalay iska hor yimid.
Dhalinyarada ayaa ah kuwo Deegaanka oo is uruursaday
oo gacan saar la leh Midowga Maxkamadaha, waxaana ay
doonayaan inay qeyb ku lahaadaan hanaanka maamul ee
degmada, waxayna taageersan yihiin in Shareecada
Islaamka lagu dhaqo.
Iska hor imaadkii shalay ayaa waxaa ku dhintay ilaa
labo ruux iyo dhaawac saddex kale, waxaana mid ka
mid ah dadka dhintay ka mid ahaa Nin safar ahaa oo
ay haleeshay Rasaas xalay fiidkii lagu furay Gaari
ay la socdeen Xoogaga Alshabaab oo marayay Bartamaha
Degmada Balcad.
Kooxo hubeysan oo xalay dad ku laayey tuulada
Dhabad ee gobolka G/gaduud iyo xiisad arintaasi ka
dhalatay oo halkaasi ka taagay
(Dhabad:Saylac.Com)-Kooxo hubeysan ayaa Xalay
fiidkii waxay si gaadmo ah ugu laayeen tuulada
Dhabad oo ku taala inta u dhexeysa degmooyinka
Caabudwaaq iyo Gelinsoor ee gobolka Galgaduud illaa
shan ruux oo ka tirsanaa dadkii tuuladaasi ku
dhaqnaa, iyago sidoo kale halkaasi ku dhaawacay
saddex ruux oo kale.
Warka ayaa intaa ku daraya in dadka la dilay iyo
kuwa la dhaawacay ay ka mid ahaayeen koox dad ah oo
hurdayey goob laga shido matoor dabka dhaliya oo ku
taala tuuladaasi, xiligaasi oo ay si gaadmo ah ku
soo weerareen dabley hubeysan oo aan la garaneynin,
iyago ka dibna rasaas ooda kaga qaaday dadkaasi oo
hurda, kana baxsaday goobta.
Lama oga sababta ka dambeeysa arintaan iyo in ay
tahay arin siyaasadeed balse waxaa la saadaalinyaa
in arintaan salka ay ku heeyso aano qabiil,waxaan
kooxaha falkaasi fuliyay ay gaarayeen ilaa 6-ruux
kuwaasi oo markii dilka ay geeysteen halkaasi ka
baxsaday .
Nabadon Cali Wali oo ka mid ah waxgaradka Deegaanka
uu falka ka dhacay ayaa sheegay in ciidamada
maamulka gobolka Galgaduud ay ku raadjiraan kooxaha
Falkaasi Geystay.
Saddexda ruux ee ku dhaawacmay dhacdadaasi ayaa la
sheegay in dhaawacooda loo qaaday isbitaalka degmada
Caabudwaaq oo iminka lagu daweynayo.
Dadkii xalay Falkaasi ku geeriyooday ayaa saakay
lagu aasay gudaha tuulada Dhabad ee gobolka
Galgaduud,si rasmi ahna looma oga illaa hadda cida
ka dambeysay weerarka dadkaasi lagu laayey iyo
sababta loo loo dilay, hase ahaatee xiisad ayaa ka
taagan deegaankaasi Dhabad, taasoo dadka ku dhaqani
ay kaga shakisan yihin beelo ay ood wadaag yihin oo
aanooyin qabiil ay dhexmartay hadda ka hor.
Sarkaal u shaqeynayey hay'ada UNCEF oo xalay lagu
dilay Degmada Xudur.
(Xudur:Saylac.Com)-Kooxo hubeysan ayaa xalay degmada
Xudur ee Gobolka Bakool waxa ay ku dileen sarkaal u
shaqeynayay hay'ada UNCEF oo ka howlgasha degmadaasi.
Lama garanayo ujeeda loo dilay sarkaalkaasi lagu
magacaabi jiray Mukhtaar Maxamed,waxaana dilay rag
ku hubeysab Bistoolad tiradooda lagu sheegay laba
nin sida ay noo xaqiijiyeen dadka deegaanka.
Dilka loo gaystay Sarkaalkaan u shaqeynyay hay'ada
UNCEF ayaa waxaa ka xumaaday wax garadka iyo
aqoonyahanada ku dhaqan degmada Xudur ee gobolka
Bakool.
Goobta uu dilku ka dhacay ayaa waxaa soo gaaray
Ciidamo taabacsan xoogaga Al-shabaab kuwaasi oo
baadi goob ugu jira kooxihii dilka u gaystay
sarkaalkaasi.
Dhawaan ayaa magaalada Marka rag hubeysan waxa ay ku
dileen sarkaal u shaqeynyay hay'ada Cunada Aduunka
ee WFP,taasoo ay ka xumaadeen shacabka ku dhaqan
gudaha dalka Soomaaliya.
Gudaha dalka Soomaaliya waxaa ku soo badanaya
ugaarsiga lagu haayo shaqaalaha u shaqeeya hay'adaha
Samafalka,waxaana dilka loo gaysanayo shaqaalaha u
shaqeeya hay'adaha gar gaarka Cambaareeyay Golaha
dhaqanka iyo midnimada beelaha Hawiye iyo dhamaan
wax garadka Soomaaliyeed.
Falka lagu beegsanayo shaqaalaha hay'adaha Samafalka
ayaa waxaa uu ku soo aadayaa xili ay sii badanayaan
dadka ka barakacaya dagaalada Dheeraaday ee ka
taagan magaalada Muqdisho oo dhibaato xoogan ay ku
heyso Deegaanada ay u barakeceen ee duleedada
magaalada Muqdisho.
Max'ed Ibraahin Raage
Saylac.com Muqdisho Somalia.
|
|
|
