Hargeysa(Saylac.com)Wasiirka Arimaha gudaha Jamuuriyada Somaliland oo ka waramaya qaraxii shalay ka dhacay Hargeysa iyo baadhitaanka ay ciimadu wadaan "Kuwii barigii baarlamaanka Somaliland argagixisada sameeyey ayaanu tuhunsahay"

Wararka kale ee ka imanaya Booliska Somaliland ayaa waxay sheegayaan in Boolisku gacanta ku dhigay gurigii ay dhawra usbuuc degenaayeen argagixisadu oo sida la sheegay Boolisku ugu tagey furihii oo qufulka albaabka hore lagaga tagay sidiisiina ugu jira . Booliska Somaliland ayaa intaa waxa uu ku daray in guriga gudihiisa loogu tagay hub iyo qalabka kiimikada ah ee laga sameeyo bamka iyo waliba qol kale oo loogu tagay caleenta loo yaqaan Qaadka oo aad u badan .

Booliska ayaa sheegay in gurigan argagixisadu ayna si toosa u kiraysan ee uu dilaal dhexaad ahi u kireeyey sidoo kalena gawaadhida ay wateeni ayna ku qornayn magacooda ee dhexeeye kale u iibiyey. Inkastoonan ilaa hada gacanta lagu dhigin ragan dilaalka ahaa ee guriga iyo gawaadhidaba u farsameeyey argagixisada, hadana waxa maalmaha inagu soo fooleh la filayaa in Booliska Jamuuriyada Somaliland uu shaaca ka qaadi doono cida ay ragan dilaalka ahi yihiin.

Guud ahaan amaanka dariiqyada isku xidha gobolada ayaa la xoojiyey ciidanka nabad sugiduna gidaar walba oo magaalada Hargeysa way tuban yihiin, sidoo kalena shacabka somaliland ayaa wadashaqayn buuxda la samaynaya ciidanka nabad sugida wixii soo kordha kala soco saylac.com.


Ilyas Hassan
Saylac.com
Hargeysa, Somamaliland
 

Sheekh Maxamed Ismaciil oo loo haysto qaraxii shalay ka dhacay magaalooyinka Hargeysa iyo Bosaaso..Oct,30,2008

Garowe(Saylac.com) Muse Geele Yusuf oo ah Badhasaab ka tirsan ismaamul goboleedka Puntland ayaa saxaafada u sheegay in ay ciidamada Puntland qabteen jeelkana u taxaabeen Sheekh Maxamed Ismaciil oo ah sheekh si weyn looga qadariyo gobolada Bari ee Soomaaliya . Badhasaabka ayaa waxa uu sheegey oo kale in sheekha lagu tuhunsan yahay inuu ka danbeeyey qaraxii shalay gilgilay labada magaalo ee Hargeysa iyo Boosaaso. Ismaamulka Puntland ayaa intaa waxa uu ku daray inuu ku daba jiro raadcada afar nin oo kale oo iyagana looga shikisan yahay qaraxii shalay.

Dhinaca Dawlada Somaliland ilaa hadda lama hayo cid loo qabqabtey qarixii shalay booliska Somaliland ayaa heegan la galiyey taniyo shalay markii qaraxu dhacay waxaana maalmaha inagu soo dhaw la filayaa inay raadad ay daba joogaan la sheegi doono.

Madaxweynaha Ismaamulka Puntland Muuse Cade ayaa tacsi u diray qaraabadii iyo ehelkii dadku kaga dhinteen Labada magaalo ee Hargeya iyo Boosaaso wuxuuna intii ku dhimatey Eebe uga rajeeyey inuu janadii ka waraabiyo .

Jaamac Haruun
Saylac.com
Garoowe, Puntland

Jendayi Frazer oo ku tilmaantay Qarxyadii Hargeysa iyo Boosaaso kuwo leh Astaamihii lagu yaqiin Alqaacida..Oct,30,2008

(Nairobi:Saylac.Com)-Haweeneyda Kaaliyaha u ah Xoghayaha Arrimaha Dibeda ee Mareykanka Jendayi Frazer ayaa ku tilmaantay qaraxyadii shalay ruxay Magaalooyinka Hargeysa iyo Boosaaso kuwo ay abaabushay Alqaacida.

Iyadoo ka hadleysay Magaalada Nairobi oo ay kaga qeyb gashay Shirkii Madaxda IGAD iyo Dowladda Embighat ayaa tibaaxday in astaamaha qaraxyadaas ay yihiin kuwii lagu yaqiin Alqaacida sida ay hadalka u dhigtay.

"Markaan aragnay nuuca qaraxyadaas, waxaa uu yahay astaamihii Alqaacida, aad baana uga xunahay"ayay tiri Jendayi Frazer oo muddo haatan laga joogo sanad booqasho ku tagtay Magaalada Hargeysa.

Mss Frazer ayaa sheegtay inay jiraan Kooxo yar oo mayal adag isla markaana diidan in Soomaaliya xasilooni hesho,waxaana ay tiri in iyaga ay raad ku leeyihiin qaraxyadan ka dhacay Labadaas Magaalo ee Soomaaliya.

Maalinimadii shalay ayay aheyd markii waqti isku dhow lala eegtay Magaalooyinka Hargeysa iyo Boosaaso qaraxyo isku mid noocuudu ahaa, kaasoo lala eegtay xarumo waa weyn ee ay leeyihin Maamulada Somaliland iyo Puntland, waxaana ku naf waayay dad gaaraya ku dhawaad 30 ruux.
 

Ciidamada dowlada  Cabdilahi Yusuf oo Ilaa 10 Neef oo Geella ku laayay kadib markii uu soo jiiray dhufeyso ay ku lahaayeen Xaruntii Guulwadayaasha ee magaalada Muqdisho. Oct,30,2008

(Muqdisho:Saylac.Com)-Ciidamada Dowladda TFG-DA ee fariisinka ku leh Xaruntii hore ee Guulwadayaasha ayaa toogasho ku dilay ilaa 10 Neef oo geella, kadib markii uu soo jiiray Geela dhufeyso ay ku lahaayeen xaruntaas, isla markaana ay ka shakiyeen in loogu soo dhuunto.

Taliyaha Ciidamada Dowladda TFG-DA ee fariisinka ku leh Xerada Guulwadayaasha oo lagu magacaabo Col. C/qaadir Codweyn ayaa xaqiijiyay in Ciidamada ay toogasho ku dileen Geella, waxaana uu sheegay in Geella oo diiday inuu dib u laabto ay rasaas ku asqeysiiyay, waxaana uu tilmaamay in Ciidamada sababta ay rasaasta ula beegsadeen ay tahay, iyagoo ka baqanayay in Xoogaga wax iska caabinta ay ugu soo dhuuntaan.

Taliyaha ayaa sidoo kale sheegay in Ciidamadiisu ay qasheen hal Neef oo Geella, waxaana uu sheegay in inta kale ay soo doonan karaan dadkii lahaa.

Deegaanada Jidka Warshadaha oo ay wehel u noqdeen dagaalo soo noq noqday ayaa ah meel cidlo ah oo mararka qaar ay Xooluhu u daaq doontaan, waxaana dadweynaha reer Muqdisho layaabeen sababaha ay Ciidamada u toogteen Geelasi

Ma ahan wax ku cusub dadka Muqdisho ku nool in Ciidamada Dowladda ay dad rayid ah laayaan, hase ahaatee waxaa dhacdadan ay tahay mid aan horay loo arag oo xoolo iska socda la laayo

Sheekh Shariif "Waxaa jira talooyin naloo soo jeediyay ee ah inaan ka mid noqono Dowladda Embighat" Oct,30,2008

(Nairobi:Saylac.Com)-Gudoomiyaha Isbaheysiga Dib u Xoreynta Garabka Jabuuti Sheekh Shariif Sheekh Axmed ayaa ka sheegay Magaalada Nairobi ee Dalka Kenya in lagula taliyay in Isbaheysigooda uu ku biiro Dowladda Embighat Soomaaliya.

Sheekh Shariif oo wareysi siinayay Idaacada BBC-da ayaa tilmaamay in dad ay kula taliyeen inay Dowladda ku biiraan, hase ahaatee wuxuuse sheegay in aysan ahayn fikirkaas mid rasmi ah balse ay yihiin tallooyin dad ay la kumeen soo jeediyeen.

"Waxaa jira dad nagula taliyay inaan ka mid noqono Dowladda Embighat, balse ma aha soo jeedintaas mid la isku afgartay, waxay ila tahay dadka fikirkaas inoo soo jeediyay in ay doonayaan in Soomaaliya dhibaatada laga saaro"ayuu yiri Sheekh Shariif Sheekh Axmed oo hadaladiisa ka dabacsanaa sidii hore.

Sheekh Shariif ayaa sidoo kale soo dhoweeyay hadalka ka soo yeeray Dowladda Ethiopia ee ahaa in Ciidamadeeda kala baxeyso Soomaaliya, waxaana uu tallaabadaas ku tilmaamay mid ay ku kalsoon yihiin inay ugu hogaansanto heshiiskii Jabuuti lagu gaaray

Dhinaca kale mar uu Sheekh Shariif ka hadlay qaraxyadii Maalintii shalay ka dhacay Magaalooyinka Hargeysa iyo Boosaaso ayuu sheegay in ay ka xun yihiin Isbaheysigiisa falalka noocaas oo kale ah oo maalin walba dadka Soomaaliyed lagu qarxiyo.

"Aad baan uga xunahay qaraxyada ka dhacay Hargeysa iyo Boosaaso, raalina kama nihi"ayuu yiri Sheekh Shariif Sheekh.

Hadalada ka soo yeeray Sheekh Shariif ayaa ku soo beegmaya, xilli maalinimadii shalay uu ka qeyb galay shir ay lahaayeen Madaxda IGAD iyo Dowladda TFG-DA ah, waxaana Sheekha isaga iyo wafdigiisa lagu casuumat shirkaas, inkastoo aysan ka hadlin, waxaana la sheegay inay kulan la qaateen Haweeneyda afrika u qaabilsan Mareykanka Jendayi Frazer

Max'ed Ibraahin Raage

Saylac.Com Muqdisho Somalia.