Sheekh Shariif oo magacaabay Taliyaha Ciidamada Maxkamadaha Gobolka Shabellaha Dhexe Nov,12,2008

(Muqdisho:Saylac.Com)- Gudoomiyaha Isbaheysiga Dib u Xoreynta Sheekh Shariif Sheekh Axmed ayaa magacaabay Taliyaha Ciidamada Maxkamadaha Gobolka Shabellaha Dhexe, iyadoo la filayo inuu dhameystiro dhowaan dhismaha Maamulka Maxkamadaha ee G/Sh/Dhexe.

Sida ay sheegayaan wararka ka imaanaya Magaalada Jowhar ee Xarunta Gobolka Shabellaha Dhexe, Ninka loo magacaabay Taliyaha Ciidamada Maxkamadaha G/Sh/Dhexe ayaa lagu magacaabaa Maxamed Muuse Janaqow, kaasoo horay uga mid ahaan jiray saraakiishii hore ee Maamulkii Muuse Suudi ee Degmada Balcad, hase ahaate ka mid ahaa Ragii gacanta ku siiyay Maxkamadaha inay Degmada Balcad ka saareen Maleeshiyaadkii Muuse Suudi sanadkii 2006-dii.

Taliyahan cusub ee loo magacaabay Gobolka Shabellaha Dhexe ayaa ka dambeeyay kadib markii Taliyaha Ciidamada Maxkamadaha ee Gobolka Shabellaha Dhexe iyo Gobolada Hiiraan, G/gaduud iyo Mudug uu ka soo horjeestay imaanshaha Sheekh Shariif ee Magaalada Jowhar.

Shariifka oo ka soo jeeda Gobolka Shabellaha Dhexe ayaa doonaya in Maamul isaga hoos yimaada u dhiso Gobolka, waxaana la filayaa in maalmaha soo socda inuu raacsiiyo Taliyaha Ammaanka Gobolka iyo Madaxa Dhaqaalaha, kuwaasoo la sheegay inuu kala tashanayo dhameystirka Maamulka Gobolka Shabellaha Dhexe oo yeelanaya Gudoomiye iyo Kuxigeenadiisa.

Macalin Dahir Caddow Calasow oo haatan ah Gudoomiyaha Gobolka Shabellaha Dhexe ee Maxkamadaha ayaa waqtigiisa waxaa uga dhiman muddo todobaad kaliya, waana nin ay isku beel yihiin Sheekh Shariif, iyadoona loo badinayo in isaga dib loo magacaabo, kadib markii la xaliyay khilaafaadkii dhanka Maamul ee Gobolka iyo mid u dhaxeeyay isaga iyo Sheekh Shariif.
 

Dagaalo xalay iyo saaka Degmada Ceeldheer ku dhex maraya Ururka Alshabaab iyo Dhalinyaro deegaanka ah ..Nov,12,2008

(Ceeldheer:Saylac.Com)- Wararka naga soo gaaraya degmada Ceeldheer ee Gobolka G/gaduud ayaa sheegaya in dagaalo ay xalay ilaa iyo saaka halkaasi ay ku dhex marayaan Ciidamo ka tirsan Alshabaab iyo Dhaliyaro hubeysan oo deegaanka ah.

Sida ay sheegayan dagaaladan oo gelinkii dambe shalay ka bilawdeen gudaha degmadaas ayaa waxay salka ku haayan joojinta qaadka iyo Sigaarka oo Alshabaab ku soo rogeen degmadaas, waxaana arrintaas ka soo horjeestay dhalinyaro deegaanka ah kuwaasi oo intay is aruursadeen weerar ku qaaday fariisin ay ciidamada Ururka Alshabaab ay ku leeyihiin degmada Ceeldheer ee gobolka Galgaduud.

In kastoo dagaalkii xalay la isku habeensaday isla markaana mar dambe uu istaagay dagaalka haddana saaka Waaberigii ayuu mar kale dib u qarxay dagaalka.

Sheekh Cali Dheere oo ah madaxa 4-ta gobol ee Ururka Alshabaab ayaa sheegay in dagaalku uu saakay markale dib u bilowday islamarkaana uu haatan dagaalku socdo.

Sheekha Ayaa waxaa uu intaa ku daray in weerarkii xalay ay ku soo qaadeen kooxaha hubaysan fariisinka Ururka Alshabaab ay halkaasi ugu geeriyoodeen 2-ka titrsan ciidamada Ururka Alshabaab iyo dhaawaca kuwa kale isagoo xusay in weeraro sedax ah oo ay xaalay ku soo qaadeen koxahaasi hueaysan ay iska difaaceen oo sidaa uu waagu ugu baryay.

Lama oga ilaa iyo hadda dhimashada iyo dhaawac uu dagaalkaas dhaliyay waxaase laga war haaya oo kaliya in dagaalka oo ah mid la isku adeegsanayo hub kala duwan uu weli ka socda deegaanka Ceeldheer


Afhayeenka Milateriga "Gacmaha kama laabaneyno is ballaarinta Alshabaab ee G/Sh/Hoose amar kaliya ayaan sugeynaa" Nov,12,2008

(Muqdisho:Saylac.Com)-Taliska Milateriga Dowladda Embighti ayaa ka hadlay dhaq dhaqaaqyada Xoogaga Alshabaab ay ka wadaan deegaano ka tirsan Gobolka Sh/Hoose,waxana ay ku tilmaameen qabsashada Xoogaga Alshabaab ee Deegaanada Gobolkaas mid is ballaaran ah.

Afhayeenka Ciidamada Milateriga Dowladda Federaalka Col. Dahir Maxamuud Xirsi (Dahir Dheere) ayaa sheegay in 24-saac gudahood ay Ciidamada Xooga Dalka duulaan ku qaadi doonaan goobaha ay alshabaab qabsatay, kuwaasoo uu ku tilmaamay kuwo nabdoonaa.

Afhayeenka ayaa tilmaamay in Mas'uuliyiinta Dowladda ay amar ka sugayaan kaliya, wuxuuna xusay in Ciidamada Xooga Dalka aanay gacmaha ka laaban doonin tallaabada ay Alshabaab ku qabsatay Deegaano ka tirsan Gobolka Sh/Hoose.



"Isha ayaan ku heynaa waxa socda, mana u dulqaadan doono is ballaarinta ay wadaan raga argagixisada ah, Ciidamada Xooga dalka amar bey sugayaan oo kaliya"ayuu yiri Afhayeenka Milateriga Dahir Dheere oo intaa ku daray in shacabka Gobolkaas uu ugu baaqayo inay iska celiyaan kuwa ku soo duulay sida uu hadalka u dhigay.

Hadalka Afhayeenkan Milateriga Col. Dahir Dheere oo ku sheegay inay tallaabo ay wax uga qabanayaan xoogaga alshabaab oo qabsaday deegaano hor leh ayaa ku soo aadaya xilli Ciidamada Dowladda Federaalka ay maara u la'yihiin xakameynta xaaladaha ammaan daro iyo weerarada ay ku soo qaadaan Xoogaga ka soo horjeeda, magaalooyinka ay gacanta ku hayaan.

Degmooyinka Khoryooley iyo Buulo Mareer oo xalay Bandow ay ku soo rogeen Alshabaab iyo xaalada saakay oo degan.Nov,12,2008
.

(Muqdisho:Saylac.Com)-Xoogaga Alshabaab ee shalay la wareegay gacan ku heynta Degmooyinka Khoryooley iyo Buulo Mareer ee Gobolka Sh/Hoose ayaa xalay halkaas ku soo rogay Bandow, ka bilaabanayay 9-ka Fiidnimo, kaasoo si rasmi ah u dhaqan galay

Sida ay sheegayaan wararka aanu maanta ka heleyno Degaanadaasi ayaa sheegaya in Xaalada ay tahay mid degan, inkastoo Ciidamadii Booliska iyo horjoogayaashooda ay joogaan meel ka baxsan degmooyinkaas, kadib markii laga awood roonaaday.

Taliyaha Ciidamada Booliska Degmada Khoryooley Nuur Shaakow Jibriil oo Ciidamadiisa ay iska hor imaad kooban la galeen Xoogaga Alshabaab ayaa sheegay in hadii uu helo Gurmad uu ku laaban doono degmada, isagoo qiray in ciidamadiisa ay u babac dhigi waayeen Xoogaga Alshabaab ee soo galay degmadaas, kuwaasoo uu ku qiyaasay inay dhamaayeen ilaa 800-oo ciidan.

Markii shalay Shabaabku qabsadeen Deegaanadaas ayaa waxaa muddo hawada ka maqnaa isgaarsiintii, kaasoo sida la rumeysan yahay ay Xoogagaas ka saareen hawada sababo aan la cadeyn, walow saacado kadib ay dib ugu soo laabateen Hawada.

Saraakiil ka tirsan Xoogaga Alshabaab oo meel fagaare kala hadlay dadweynaha Khoryooley iyo Buulo Mareer ayaa sheegay in hadafkooda aanu aheyn is ballaarsi, hase ahaatee ay tahay in ay xaqiijiyaan amaanka deegaanadaas.

Dadka qaarkii ayaa aaminsan in imaanshaha Alshabaab ee Deegaanada Gobolka Sh/Hoose ay tahay mid ujeedo gaar leh, maadaama Yusuf Indha Cadde oo mar soo xukumi jiray Gobolkaas uu dhowaan sheegay in maamul islaami ah uu dhisayo deegaanada Gobolka, laakiin hadalkaas ayaa waqtigiisa waxaa ka soo hormaray tallaabada muuqata ee alshabaab, kaasoo xaglin karta ujeedooyinka uu damacsanaa Mr Indha Cadde ee uu ku doonayo inuu dib usoo nooleeyo goobihii uu sanado ka arimin jiray.



Max'ed Ibraahin Raage

Saylac.Com Muqdisho Somalia.