|
|
 |
|
| |
Culumaa'udiinka Waday
dadaalada la isugu keenayo Maxkamadaha iyo Hogaanka
Gudaha ee Maxkamadaha Islaamka oo kulmay.
.Nov,10,2008
(Muqdisho:Saylac.Com)-Hogaanka Gudaha ee Maxkamadaha
islaamka iyo Majmaca Culumaa'udiinka Soomaaliyed ee
waday dadaalada ay ku dhex dhexaadinayaan garabyada
Maxkamadaha u kala qeybsamay ayaa shalay kulan
xasaasi ah ku yeeshay Magaalada Muqdisho.
Afhayeenka Maxkamadaha Islaamka C/raxiin Ciise
Caddow oo Saxaafada ugu warbixiyay kulanka ay la
qaateen Culumaa'udiinka u istaagay isu keenida
Hogaanka Maxkamadaha ee garabyada u kala jabay ayaa
sheegay in ay isku af garteen dhamaan waxyaabihii ay
ka wada hadleen oo ay ugu muhiimsanaayeen qodobka la
xiriira dhamaynta khilaafaadka u dhexeeya Hogaanka
Gudaha ee Maxkamadaha Islaamiga.
Waxaa uu sheegay C/raxiim Ciise Caddow in ay
dhankooda soo dhoweynayaan dadaalada dib u
heshiisiinta ee laga dhex wado Maxkamadaha islaamka,
isagoona sheegay in dhinacooda ay ka qaateen
fikradihii ay usoo bandhigeen Culimada.
"Culimadu waxay noo soo bandhigeen qaabka ay u
doonayaan in lagu dhameeyo khilaafaadka Hogaanka
maxkamadaha iyo kulan guud oo loo ballansan yahay in
gudaha dalka Soomaaliya loogu qabto dhammaan
Hogaanka Midowga Maxkamadaha Islaamiga
Soomaaliyeed"ayuu yiri C/raxiin Ciise Caddow oo ka
mid ah garabka raacsan Sheekh Shariif Sheekh Axmed
Dhowaan ayay ahayd markii culimaa'udiinka ugu
caansan dalka Soomaaliya bayaan ay soo saareen ku
sheegeen inay isku keenayaan dhamaan Hogaanka sare
ee Maxkamadaha Islaamiga oo haatan aad ugu kala
fogaaday dhinaca fikirka, iyagoo sheegay inay
qabanayaan kulan guud oo ay isugu keenayaan, hase
ahaatee dadaalada culimada waxaa ka soo horjeestay
qaar ka mid ah Hogaanka Maxkamadaha sida Sheekh
Yuusuf Indha Cadde.
Alshabaab oo xoog ku soo furtay Gudoomiyihii
Waxbarashada G/Hiiraan oo shalay la afduubtay.
Nov,10,2008
(Baladweyne:Saylac.Com)-Xoogaga Dhalinyar diimeedka
Alshabaab ayaa xoog ku soo furtay Gudoomiyihii
Waxbarashada Gobolka Hiiraan, kaasoo shalay gelinkii
dambe ay kooxo Hubeysan afduubteen.
Wararka ayaa sheegaya in Xoogaga Alshabaab ay si
nabadgelyo ah ku soo furtay, iyadoona aanay dhicin
wax iska hor imaad ah oo dhex maray Kooxihii
Afduubtay iyo Alshabaab.
Maxamed Macalin Cusmaan ayaa shalay lagu afduubtay
meel u dhow Tuulo lagu magacaabo Raangaabo oo ka
tirsan Gobolka Hiiraan, waxaana xilligaas gaari kala
dagay kooxo aan heybtooda la aqoon.
Saraakiil ka tirsan Alshabaab ayaa sheegay inay soo
qabteen Kooxihii afduubka geystay, waxaana la
sheegay in kooxahaas oo afduubtay mas'uulkan ay
sidoo kale isku dayi rabeen inay dhacaan Gaari,
balse ay ka bad baadiyeen Xoogaga Alshabaab.
Xilliga ay Ciidamadu furanayeen Gudoomiyaha
Waxbarashada Gobolka Hiiraan ayaa la sheegay in ay
hurdayeen Kooxihii afduubtay, kuwaasoo ay
hareereeyeen, dabadeedna ay gacanta ku dhigeen Ragii
afduubka maleegay oo gaarayay 11-ruux oo markii hore
damacsanaa inay afduubtaan gaari siday Buugaag
waxbarasho oo ay laheyd Hey'ad ka howl gasha
Magaalada Baladweyn ee xarunta gobolka Hiiraan.
Baydhabo oo saakay kacsan, kadib dilkii xalay loogu
geystay Gudoomiye Kuxigeenkii 2-aad ee Gobolka Bay.Nov,10,2008
(Baydhabo:Saylac.Com)-Xaalada magaalada Baydhabo
ayaa kacsan, kadib markii Ciidamada Dowladda TFG-da
ay isku ballaariyeen qeybo ka mid ah Xaafadaha
Magaalada, taasoo ka dambeysay dil xalay loo geystay
Gudoomiye Kuxigeenkii 2-aad ee Gobolka Bay.
Sida ay sheegayaan wararka aanu s halkaas ka heleyno
dhaq dhaqaaqii Magaalada ayaa gebi ahaanba hakad
galay, waxaana xiran goobaha ganacsiga ee ku yaal
Hareeraha Wadada laamiga.
Ciidamada Booliska iyo kuwa milateriga oo feejignaan
sare ku jira ayaa taagan wadooyinka hareeraheeda,
mana muuqato howl gal ay ka sameynayaan Magaalada.
Kooxo Hubeysan ayaa xalay fiidkii Magaalada Baydhabo
ku dilay Gudoomiye Kuxigeenkii Labaad ee Gobolka Bay
Xuseen Nuurow Sheekh, kaasoo sida la sheegay
hoygiisa lagu weeraray.
Ammaanka Magaalada Baydhabo oo maalmihii u dambeeyay
sii xumaanayay ayaa u muuqda mid faraha ka sii
baxaya, Waxaana dilalka qorsheysan ay ku soo
kordhayaan Magaalada.
Dilkan ayaa noqonaya kii u horeeyay ee loo geysto
Mas'uul sare oo ka tirsan Maamulka Gobolka Bay, oo
maalmihii u dambeeyay xakameyn waayay weerarada ka
dhacaya Magaalada Baydhabo
Qaar ka mid ah xoogaga ka dagaalama gudaha dalka oo
yeeshay Dalad ay ku mideeysan yihiin.Nov,10,2008
(Muqdisho:Saylac.Com)- Sedax ka mid ah dhinacyada
Kooxaha Islaamiyiinta ee ka dagaalama gudaha dalka
Soomaaliya ayaa waxa ay maanta sheegeen in ay
midoobayaan islamarkaana ay samaysanaaan hal Urur oo
wata hal magac.
Maxamed Aadan Koofi oo afhayeen u ah Maxkamadaha ka
madax bannaan Isbaheysiga Sh Shariif Madaxda uu u
yahay ayaa waxaa uu sheegay in laga bilaabo maanta
ay midoobayaan.
Maxkamadaha ee ka madax Banaan isbahaysiga,Ururka Al
Shabaab iyo Mucaskarka Raasgaanbooni oo dhamaantood
ka mid ah xoogaga ka dagaalama Soomaaliya kana soo
horjeeda jiritaanka Dowladda Federaalka iyo
joogitaanka Ciidamada Shisheeye Soomaaliya ayaa
waxaa ay sheegeen in ay u midoobeen la dagaalnka
dowlada KMG Soomaaliya iyo Ciidamada Shisheeye.
Kooxahan sidoo kale waxay diidan yihiin oo aysanba
ogoleyn inay taageeran heshiiskii xabad joojinta
ahaa ee dhex maray Isbaheysiga Dib u xoreynta Sh
Shariif Madaxda ka yahay iyo Xukuumadda Nuur Cadde.
Dowladda Embighati oo sheegtay inay qabatay mid ka
mid ah Ilaalada Suuqa Bakaaraha oo ka bar bar
dagaalamayay Kooxaha Hubeysan..Nov,10,2008
(Muqdisho:Saylac.Com)-Dowladda Federaalka Soomaaliy
ayaa Sheegtay in ay gacanta ku dhigeen askari ka
tirsan ciidamada ilaalada Suuqa Bakaaraha oo ka bar
bar dagaalamayay kooxaha hubeysan ee ka horjeeda ee
badnaa lagu eedeeyo inay gabaad ka dhigtaan
nawaaxiga Suuqa in kasto warkaas dhawr jeer la
beeniyay.
Dagaalkii shalay ka dhacay magaalada Muqdisho gaar
ahaan Nawaaxiga Isgoyska Florence una dhaxeeyay
ciidamada Dowladda oo gacan ka heleyeen Ciidamada
Itoobiya iyo kooxaha ka soo horjeeda ayaa Afhayeenka
Militariga Daahir Maxamed Xirsi waxaa uu sheegay in
ay gacanta ku dhigeen Askari ka tirsan ciidamada
Ilaalada Suuqa Bakaraha oo uu ku eedeeyay in uu k
mid ahaa kooxihii la dagalamayay.
Gudoomiyaha ganacsatada Suuqa Bakaaraha Cali Maxamed
Siyaad (Cali Dheere) ayaa isna beeniyay hadalkaasi
ka soo yeeray Afhayeenka ciidamada dowlada waxaana
uu sheegay in ciidamada ilaalad Suuqa Bakaraha ay
yihiin kuwa tiro kooban islamarkana lambaro gaar aha
wata oo aysan ka qeyb qaadan dagaalada isgoo ku
eedeeyay dowlad in ay markii 19-aad jabiyeen
heshiiskii ay kala saxiixdeen ganacsatada Suuqa
Bakaaraha iyo masuuliyiinta dowlada goor hore.
Max'ed Ibraahin Raage
Saylac.Com Muqdisho Somalia.
|
|
|
