|
|
 |
|
|
Roobab Mahiigaan ah oo in
ka badan 24-saac ka da'ayey Muqdisho iyo
hareeraheeda oo saameyn xooggan ku yeeshay
kumanaan qoys oo ku barakacay duleedka caasimada
May,31,2008
+Sawiro naxadin leh
(Muqdisho:Saylac.com)- Roobab aan kala go'
laheyn oo in ka badan muddo 48 saac ah ka da'yey
magaalada Muqdisho iyo nawaxigeeda ayaa saameyn
aad u xooggan ku yeeshay inta badan dadweynaha
ku dhaqan magaalada iyo kumanaanka qooys ee ku
barakacay duleedyadeeda kuwaasoo markii horeba
xaalada adag oo dhinaca ah nolosha ah ay
halkaasi ku heysatay.
Roobabkan oo bilowday saqdii dhexe ee habeen
hore ayaa si xiriir ah oo aan kala joogsi laheyn
u da'ayey shalay illaa xalay oo dhan, waxaana
roobabkaasi uu hakaday saaka waaberigii, iyadoo
daruuraha ay weli yihiin kuwo dul hoganayaa
magaalada oo ay dhici karto in roobabka ay
halkooda ka sii socdaan.
Dadweynaha kumanaanka gaaraya ee ku barakacay
duleedka koonfureed ee magaalada Muqdisho ayaa
saameynta ugu xooggan ay roobabkaasi ku yeesheen
waxaana soo foodsaaray hoy la'aan ka dib markii
aqaladii ay degenayeen oo ka sameysnaa baco iyo
cooshado aan adkeysi badan laheyn ay ku
burbureen roobabkii da'ayey, xilli dadka
halkaasi ku sugan intooda badan ay horey u
heysteen xaalado nololeed oo ay ka mid yihiin
Gaajo, iyo cuduro fara badan, waxaana aqaladii
ku yiilay deegaankaasi oo dhan ay noqdeen kuwo
ay baab'iyeen roobabka, waxaana intii ay
roobabkaasi da'ayeen halkaasi ku dhinatay illaa
labo caruur ah.
Dhinaca kale, roobabkan ayaa sidoo kale saameyn
aad u xooggan ku yeeshay wadooyinka iyo
xaafadaha magaalada Muqdisho, kuwaasoo qaarkood
ay ka qodmeen boholo aad u waaweyn oo ay
fariisteen biyo faraha badan oo roobkaasi ka
dhashay, waxaa sare u kacay qiimaha lagu raaco
gaadiidka isaga goosha magaalada oo markii
horeba ahaa mid qaali ah, waxaana, halkii
saddexda kun lagu raaci jiray uu imika noqday
illaa shan kun Shso, waxaana arintaasi ugu wacan
wadooyinka oo roobab waxyeelo ba'an u geysteen
xilli muddo 17 sano ah aysan jirin wax dayactir
ah oo lagu sameeyey.
Max'ed Ibraahim Raage
Saylac.com Muqdisho Somalia. |
|
|
