Wararkii ugu dambeeyay is
casilaada Madaxweyne Yuusuf oo maalinta sabtida ku
dhawaaqaya (Xog Rasmi ah) ..Dec,24,2008
(Baydhabo:Saylac.Com)-Sida ay u xaqiijiyeen
Shabakada Saylac.com illo wareedyo lagu kalsoonaan
karo ayaa sheegaya in Madaxweynaha TFG-da C/llaahi
Yuusuf Axmed uu kama dambeys maalinta sabtida ah uu
iska casilayo Xafiiska Madaxweynaha.
Warkan ayaa ka soo baxay Safaarada Mareykanka ay ku
leeyahay Magaalada Nairobi, kuwaasoo maanta xiriir
la soo sameeyay saraakiisha Dowladda,waxana ay ku
wargeliyay in Madaxweynaha uu is casilayo Maalinta
sabtida ee taariikhdu tahay 27-ka bisha December.
Sidoo kale warkan aanu ka soo xiganay illaha ku dhow
dhow Saraakiisha Dowladda ayaa intaa ku daraya in
Taliyaha Ciidamada Booliska Soomaaliyed Gen. Cabdi
Qeybdiid lagu soo wargeliyay arrinkaas, isla
markaana uu dhowro ammaanka Caasimada marka
Madaxweynuhu ku dhawaaqo Maalinta Sabtida is
casilaadiisa.
Madaxweyne C/llaahi Yuusuf ayaa la filayaa in
Baarlamaanka uu hortago marka uu u gudbiyo
istaqaaladiisa is casilaad, iyadoona sida sharciga
yahayna uu Madaxweynenimada dalkana uu sii heyn
doono Afhayeenka Baarlamaanka Aadan Madoobe oo xilka
Madaxweyne qabanaya illaa laga soo doorto Madaxweyne
Soomaaliyed.
Saraakiisha Safaarada Mareykanka ee Nairobi oo la
soo xiriiray Ra'iisul Wasaaraha Soomaaliya Nuur
Cadde iyo Gudoomiyaha Isbaheysiga Dib u Xoreynta
Sheekh Shariif ayaa ka codsaday in aan la waxyeeleyn
Beesha uu ka soo jeeda Madaxweyne Yuusuf marka uu is
casilo, isla markaana aan farta lagu fiiqin
Ciidamada ku heybta ah ee ku sugan Caasimada
Muqdisho.
Dadka qaar ayaa ka cabsi qaba in dagaalo lagu hoobto
ay ka qarxaan Caasimada Muqdisho marka Madaxweynuhu
uu is casilo, isla markaana ay dhacaan waxa loogu
yeero isir faquuqii hada ka hor dalka ka dhacay ee
91-kii
Axmed Diiriye oo ku baaqay
in xabada laga joojiyay Ciidamada Ethiopia
wadooyinkana loo furo inta ay baxayaan ..Dec,24,2008
(Muqdisho:Saylac.Com)-Afhayeenka Beelaha Hawiye
Axmed Diiriye Cali ayaa u jeediyay Kooxaha
Muqaawamada inay xabadda ka joojiyaana isla markaan
wadada u furaan Ciidamada Ethiopia inta ka harsan
bisha oo uu xusay inay uga baxayaan dalka waqtigii
loogu tala galay.
Axmed Diiriye ayaa ku taliyay inaan la lumin fursad
dahabi ah oo xilligan ay ku baxayaan Ciidamada
Ethiopia, isagoona taa ka shanqariyay.
"Muqaawamadu waxaan u jeedinayaa inay xabada ka
joojiyaan wadadana u furaan Ethiopian-ka inta ka
harsan bishan"ayuu yiri Axmed Diiriye
Nabadoon Axmed Diiriye ayaa sheegay hadii ay
arintani suura gasho ay muhiim u tahay dadka
Soomaaliyeed oo uu tilmaamay in ay ka soo daaleen
dhibaatooyinka ay ku hayaan ciidamada Ethiopia,
waxaana uu intaa ku daray hadii waqtiga ay qabsatay
Ethiopia ay kula bixi weyso ciidamadeeda muqaawamada
iyo shacabkuba ay u laba jibaaraan weeraradii looga
soo horjeeday.
Sidoo kale Axmed Diiriye waxaa ugu baaqay
Muqaawamada inaysan ku dhex dagaalamin shacabka
dhexdooda, wuxuuna ka codsaday inay ku dadaalaan
midnimadooda sida uu hadalka u dhigay.
Xoogaga Muqaawamada ayaa balan ku qaaday inay sii
wadayaan xabadda inta askariga ugu dambeeyay ee
Ethiopian-ka ka tagayo xuduuda wadankooda, waxaana
cabsi iyo wal wal laga muujinayaa cawaaqib xumida ka
dhalan karta bixitaanka Ciidamada Ethiopia oo ay
dhici karto inay weeraro waajahaan marka ay baxayaan.
Dowladda Ethiopia ayaa dhowaan sheegtay in
Ciidamadeeda kala baxeyso Soomaaliya, iyadoona
go'aankeeda ku sheegtay mid lagama laabtaan ah,
waxaana ay ku gacan seyrtay codsi uga yimid Midowga
Afrika oo ahaa in Ciidamadeeda ku sii nagaadaan
Soomaaliya.
Sheekh Shariif iyo
Kuxigeenkiisii hore ee Gudiga Fulinta oo si lama
filaan ah goor dhow ku soo gaaray Magaalada Muqdisho.
Dec,24,2008
(Muqdisho:Saylac.Com)-Gudoomiyaha Isbaheysiga Dib u
Xoreynta Sheekh Shariif Sheekh Axmed ayaa goor dhow
dib ugu soo laabtay Magaalada Muqdisho, waxana
xiligan socdaalkiisa ku wehliya Gudoomiye
Kuxigeenkiisii Gudiga Fulinta xilligii Midowgii
Maxkamadaha ka talinayeen qeybo ka mid ah K/Soomaaliya.
Wararka ayaa sheegaya in Sheekh Shariif iyo Sheekh
C/raxmaan Janaqow ay ka soo dageen Diyaarad qaas ah
oo abaarihii 2-dii duhurnimo ee maanta soo caga
dhigatay Garoonka Diyaaradaha Muqdisho.
Sheekh Shariif ayaa Garoonka Diyaaradaha lagaga soo
galbiyay Gaari kuwa caadiga ah, inkastoo ilaalo gaar
ah ay ka hayeen Ciidamada AMISOM oo ku hubeysan
gaadiidka gaashaaman, kuwaasoo markii ay usoo
galbiyeen Isgoyska Jubba ee Waqooyiga Muqdisho dib u
laabtay.
Ciidamo la sheegay inay ku heyb ahaayeen Sheekh
Shariif ayaa ka qeyb qaatay sugida ammaankiisa,
kuwaasoo dhar caadi gashnaa, isla markaana xirnaa
Camaamada lagu yaqaan Maxkamadaha
Shariifka ayaa mar kale la dajiyay Hotelkii
Magaalada Muqdisho uu todobaadkii hore ka deganaa
markii uu soo gaaray muddo labo sano kadib, waxaana
aad loo adkeeyay ammaanka Hotelka Lafweyn oo ku yaal
Waqooyiga Muqdisho.
Max'ed Ibraahin Raage
Saylac.Com Muqdisho Somalia.
|
