Ismacil Cumar Geleh oo u yeedhay Cabdilahi Yusuf si uu  wadahadal ugu sameeyo isaga iyo Nuur Cade iyo waliba si uu ugu qanciyo heshiiskii Jabuuti..Dec,19,2008
Djibouti(Saylac.com) Warar lagu kalsoon yahay ayaa soo gaadhay xafiiska shabakada saylac.com ee Jabuuti. Warkan oo sheegaya in uu dhawaan Cabdilahi Yusuf socdaal ku soo gaadhi doono dalka Jabuuti, ayaa sarkaal sare oo ka tirsan wasaarada arimaha dibada dalka Jabuuti waxa uu saylac.com u cadeeyey in socdaalkani uu socdaalkani daba socdo sidii dawlada Jabuuti ay ugu qancin lahayn Cabdilahi Yusuf inuu tixgaliyo heshiiskii hada ka hor dhex maray Maxaakiimta Islaamiga iyo Dawlada Cabdilahi Yusuf ee ka dhacay Dalka Jabuuti.

Ra'iiisul Wasaare Nuur Cade Cabdilahi Yusuf iyo Gabadh yar oo sababtooda u dhiban
Heshiiskan ayaa waxa uu dhigayey in ciidamada Itoobiya si dhakhsiyo ah uga baxaan dalka Somaliya, balse uu qodobkaa isaga ah Cabdilahi Yusuf gashaanka ku dhuftey khilaaf ba'anina uu soo kala dhex galay isaga iyo Ra'iisul Wasaare Nuur Cade oo uu markii danbe jagada Ra'iisul wasaarenimo ka xayuubiyey Cabdilahi Yusuf.

Madaxweyne Ismaciil Cumar Geleh ayaa la wadaa inuu fool ka fool isku hor fadhiisiyo Ra'iisul Wasaare Nuur Cade oo hada k u sugan dalka Jabuuti xalay fiidkiina soo gaadha dalka Jabuuti.


Baarlamaanka Baydhabo ayaa si buuxda u taageersan Ra'iisul wasaare Nuur Cade isla markaana si buuxda uga soo horjeeda Ra'iisul wasaaraha cusub ee uu dhawaan magacaabay Cabdilahi Yusuf oo magaciisa la yidhaa Maxamed Maxamuud Guleed (Gacmadheere).


Kulankan lagu wado inuu dhex maro Cabdilahi Yusuf iyo Nuur Cade ayaa waxa uu yahay kii nuuciisan ah ee dalka Jabuuti uu faragaliyo taniyo intuu bilawday khilaafka soo kala dhex galay Nuur Cade iyo Cabdilahi Yusuf.

Hussein Osman
Saylac.com
Djibouti- Djibouti

Wararka soomaaliya hoos ka aqri

*********************************************************************************************************

Sheekh Shariif iyo wafdigii uu hogaaminayay oo maanta ka ambabaxay Muqdisho
Dec,19,2008
(Muqdisho:Saylac.Com)-Gudoomiyaha Isbaheysiga Dib u Xoreynta Sheekh Shariif Sheekh Axmed iyo Wafdi uu hogaaminayo ayaa maanta dib uga laabtay Magaalada Muqdisho kadib muddo labo todobaad oo ay ku sugnaayeen Caasimada Soomaaliya.

Sheekh Shariif iyo wafdigiisa oo ay Muqdisho ka sii galbiyeen Mas'uuliyiin ka tirsan Xukuumada KMG iyo Maamulka Gobolka Banaadir ayaa u kicitimay Magaalada Jabuuti oo xarun u ah Isbaheysigiisa.

Ka hor inta uusan Sheekhu ka dhoofin Magaalada Muqdisho ayuu wariyeyaasha ugu waramay gudaha Garoonka Aadan Cadde International Air Port,waxaana uu ugu horeyn wariyeyaasha ugu waramay ujeedooyinkii ay Muqdisho u yimaadeen.

Sheekh Shariif oo ka codsaday Wariyeyaasha in aysan wax su'aal ah weydiin ayaa sheegay in qorshihii Muqdisho ay u yimaadeen ay aheyd inay dar dar geliyaan Heshiiskii Jabuuti, isla markaana qeybaha kala duwan bulshada, culumaa'udiinka iyo beelaha Soomaaliyeed ay kala shireen ahmiyada shirka, wuxuuna xusay in guud ahaan ay taageereen Heshiiskaas.

Diyaarada Shariifka ka qaaday Magaalada Muqdisho oo si toos ah uga timid dalka Jabuuti ayaa waxaa ka soo degtay Xoghayaha Arrimaha Gudaha Cumar Xaashi Aadan, waxaana diyaaradaas sii raacay Shariifka, iyadoona Cumar Xaashi sida la sheegayo ku haray Magaalada Muqdisho.

Warar lagu kalsoonaan karo ayaa sheegaya in xubno ka mid ah Gudiga Ammaanka ee Isbaheysiga Dib u Xoreynta uga qeyb galay Shirkii Jabuuti ay Muqdisho u joogaan dhameystirka Heshiiskaas, iyadoona ay gudaha dalka kula kulmi doono dhinaca kale ee Dowladda KMG gudigiisii Amniga.

Bixitaanka Shariifka ayaa ku soo aadaya xilli Ra'iisul Wasaare Nuur Cadde oo shalay soo gaaray Muqdisho, isla markaana muddo saacad ku sugnaa Magaalada uu isna gaaray Jabuuti, iyadoona halkaas laga yaabo in Madaxda Isbaheysiga iyo Dowladda KMG ah ay ku kulmaan.



Mid ka mid ah Xoogaga Islaamiga oo xabad joojin kala dhex dhigay dhinacyadii ku dagaalamay B/weyn Dec,19,2008
(Baladweyne:Saylac.Com)-Waxaa maanta xasiloon xaalada magaalada Baladweyn ee xarunta Gobolka Hiiraan kadib markii halkaasi ay shalay ka dhaceen dagaalo u dhaxeeyey ciidamo ka wada tirsan Maxaakiimta Islaamiga ah ee gacanta ku haya magaalada.

Waxaa saakay dib u furmay isku socodka dadka iyo gaadiidka ee xaafadaha magaalada Baladweyn, waxaana lagu arkayaa dadweyne ku dhex lugeynayay goobihii ay shalay shaqaaqadu ka dhacday ee magaalada Baladweyne.

Xasilnaanta magaalada ayaa waxaa ay ka dambeysay kadib markii ay soo kala dhex galeen kooxaha dirirsan, odayaasha dhaqanka iyo mid ka mid ah kooxaha kacdoonka oo lagu magacaabo Jabhada Islaamiga ah ee Somalia.

Afhayeen u hadlay Jabhada Islaamiga ah ee Somalia ayaa waxaa uu u sheegay in ay wadaan dadaal ay ku kala dhex dhigayaan xabad joojin labada dhinac ee ku dagaalsan magaalada, isaga oo intaasi ku daray in haatan ay ku guuleysteen in xabada la joojiyo.

Odayaasha dhaqanka ee magaalada ayaa iyaguna wada dadaalo aan yareyn oo ay ku doonayaan in ay ku qoobijiyaan xiisad si loo joojiyo dhiig ku daata gudaha magaalada.

Magaalada Baladweyn ayaa xaalkeedu qasmay kadib markii ay ku dagaalameen ciidamo ka wada tirsan Maxaakiimta Islaamiga shalay iyo maalintii Arbacadi ee aanu kasoo gudubnay, waxaana xiisadaas aheyd mid siyaasadeed oo u kala dhaxeysay dhinacyada ay kala taageeraan ee fadhigooda kala yahay Jabuuti iyo Asmara.


Max'ed Ibraahin Raage

Saylac.Com Muqdisho Somalia.