Wafdigii Sheekh Shariif oo loo soo galbiyay Dhinaca Hotelka Lafweyn ee
Waqooyiga Muqdisho..dec,10,2008


(Muqdisho:Saylac.Com)-Abaaro 3-kii Galabnimo ayaa Wafdigii uu
hogaaminayay Gudoomiyaha Isbaheysiga Dib u Xoreynta waxaa ay ka soo
degeen garoonka Diyaardaha ee Aadan Cadde ee magaalada Muqdisho
waxana aad amaanka u adkeeyanayay ciidamo isugu jira kuwa dowlada
TFG-da iyo Ciidamada ka socda Midowga Africa ee AMISOM.


Sida ay sheegayaan wararka Sheekh Shariif oo aan raacin gawaarida
qafilan ee kuwa AMISOM ayaa Garoonka Diyaaradaha Caalamiga ah ee
Muqdisho lagaga soo galbiyay gawaarida kuwa raaxada ah, iyadoona
Ciidamada AMISOM ay amaankiisa sugayeen Garoonka ilaa Wadada Maka
Almukarama, halkaasoo la sheegay in ay ka soo noqdeen.

Wararka ayaa sheegaya in Shariifka ay amaankiisa ka qeyb qaadanayaan
Labo gaari oo kuwa Maxkamadaha ah, kuwaasoo ka qeyb qaatay
galbintiisa, waxaana sidoo kale Garoonka Diyaaradaha ku soo dhoweeyay
Xubno ka tirsan Golaha wasiirada dowlada Embight iyo Maamulka Gobolka
Banaadir iyo xubno isaga taageersan.



Socdaalka Sheekh Shariif oo ahaa mid qorsheysnaa ayaa la filayay inay
ka soo dagaan Garoonka macmalka ee Cisaley Duleedka waqooyi ee
Magaalada Muqdisho, hase ahaatee dib ayaa loo dhigay sababo aan la
shaacin,waxana wararka qaar ay sheegayaan in dhanka amaanka dartiisa
loo weeciyay ka soo degitaanka Garoonkaasi ee wafdiga shiikh Shariif
Shiikh Axmed.

Ammaanka Hotelka Lafweyn ee Degmada Yaaqshiid oo kaabiga ku haaya
Isgoyska Fagax ayaa aad loo adkeeyay, waxaana la xiray wadada ka
timaada SII SII ilaa tan Fagax ee ka timaada Hotelka Ramadaan halkasi
oo ay isku gadaameen ciidamo isugu jira Maxkamadaha iyo Kuwa Dowlada
Ebighti oo isaga ku heyb ah oo markii ugu horeeysay isku yimid,
halkaas loo diidayay in ay isticmaalaan gaadiidka iyo dadkaba..

Socdaalka Sheekh Shariif waxa ku wehliya xubno ka badan 15-ruux oo ay
ku jiraan Xubnaha Isbaheysiga Dib u Xoreynta iyo qaar ka mid ah golaha
wasiirada dowlada uu hogaamiyo Cabdullaahi Yuusuf.

Waa markii ugu horeeysay ee shiikh Shariif uu ka soo dego garoonka
diyaarada ee Aadan Cadde ee magaalada Muqdisho tan iyo Mariii
dagaalada Xoogan ay ciidamada maxkamadaha la galeen ciidamada is
kaashanaya ee dowlada Embight iyo kuwa Ethiopia.


.
Banaan bax lagu taageerayo imaanshaha Sheekh Shariif oo ka galabta ka
dhacay Waqooyiga Muqdisho.dec,10,2008


(Muqdisho:Saylac.Com)-Boqolaal dadweyne ayaa isugu soo baxay
wadooyinka dhinaca waqooyi dhaca ee Magaalada Muqdisho, kuwaasoo
taageerayay socdaalka Gudoomiyaha Isbaheysiga Dib u Xoreynta Sheekh
Shariif uu maanta ku soo gaaray Magaalada Muqdisho.

Dadweynaha banaan baxayay oo u badnaa dhalinyaro, caruur iyo haween
ayaa ku dhawaaqayay hal ku dhigyo ay ku soo dhoweynayaan Sheekh
Shariif socdaalkiisa nabada waxana ay u luxayeen Caleemo Qoyan iyagoo
wadooyinka Waaweeyn ee Muqdisho isugu soo baxay.

Wadooyinka Waqooyiga Muqdisho oo ay xireen dadweynahan xamaasadeysan
ayaa marba marka ka dambeysay sii kordhayay, kuwaasoo socod ku maray
Degmooyinka Shibis, Yaaqshiid, Kaaraan, C/casiis iyo Shangaani oo
dhamaantooda kuwada yaala Woqooyiga magaalada Muqdisho.

Dadweynaha ayaa hormaray Hotelka Sheekh Shariif iyo wafdigiisa la
dajiyay, waxaana ay siteen caleemo qoyan iyo boorar ay ku qornaa hal
ku dhigyo taageero iyo soo dhoweyn isugu jirta.

Banaan baxan ayaa imaanaya saacad kadib markii Wafdi uu hogaaminayo
Sheekh Shariif uu soo gaaray Magaalada Muqdisho, iyadoona sida muuqata
banaan baxayaashan ay yihiin kuwo ku beel ah Sheekh Shariif ee dega
deegaanada Waqooyiga.


 

Xiisad maalintii labaad ka taagan Deegaanka Kala Beyrka, Xoogaga
Maxkamadaha iyo Ciidamada Ethiopia oo isku hor fadhiya.dec,10,2008


(Baladweyne:Saylac.Com)-Xiisad xoogan iyo dhaq dhaqaaqyo milatery ayaa
maalintii labaad ka taagan Deegaanka Kala Beyr ee Gobolka Hiiraan,
halkaasoo ay isku hor fadhiyaan Xoogaga Maxkamadaha iyo Ciidamada
Ethiopia oo shalay ku soo laabtay halkaas.

Wararka ayaa sheegaya in xiisadan oo taagneyd shalay iyo xalay ay
saameyn ku yeelatay magaalada Baladweyn ee Xarunta Gobolka Hiiraan,
waxaana aad looga hadal haayo dagaalo dhex mara dhinacyada isku hor
fadhiya Kala Beyrka oo qiyaastii 20-Km dhinaca waqooyi kaga beegan
Magaalada Baladweyn.

Labada Ciidan ayaa isku jira wax ka yar 1-KM, waxaana daqiiqad kasta
ama saacad kasta suura gal ah inuu dagaal ka dhex qarxo, waxaana
Xoogaga Maxkamadaha ay isku fidiyeen deegaanada howdka halka
Ethiopiankana ay joogaan Kala Beyr iyo hareeraheeda halkaasoo ay
difaacyo adag ka sameysteen.

Xiisadaha dagaal ayaa sidoo kale waxaa ay saameyn ku yeesheen isu
socodkaa gaadiidka ee isaga kala goosha Gobolada Dhexe, kuwa Waqooyi
iyo kuwa koonfureed oo marin muhiim u ahaa halka ay dageen Ciidamada
Ethiopianka ee Deegaanka Kala Beyr.

Dadweynaha ku dhaqan magaalada Baladweyn ayaa walaac aad u xoogan uu
ka soo wajahay mar kale ciidamadan Ethiopian-ka ee soo gaaray duleedka
magaaladaasi oo horey dhibaatooyin badan ugu geystay 3-bilood ka hor
intii ay ku sugnaayeen gudaha iyo daafaha Baladweyn, iyadoo dhinaca
kale maamulka Maxkamadaha ee Gobolka Hiiraan uu ku hanjabay in ay
dagaal la geli doonaan ciidamada Ethiopia ee mar kale soo galay
deegaano ka tirsan gobolka Hiiraan.

Si kastaba ha ahaatee xiisadaha ka taagan gobolka Hiiraan ayaa u
muuqta kuwa sahli kara dagaalo xoogan oo halkaasi ku dhex mara
ciidamada Ethiopia ee dhawaan soo galay gobolka Hiiraan iyo xoogaga
islaamiga ee horay gobolkaasi ugu sugnaa.


Ciidamada Ethiopia oo ku go'doonsan goobihii shalay dagaalada xiriirka
ah ku qabsadeen ee Gobolka Shabellaha Hoose.dec,10,2008


(Leego:Saylac.Com)-Inkastoo ay degan tahay Xaalada wadada isku xirta
Muqdisho iyo Baydhabo oo dagaalo kulul ay ka dhaceen maalinimadii
shalay, hadana waxaa soo baxaya warar dheeraad ah oo ku aadan
dagaaladaasi.

Ciidamada Ethiopia ayaa wali ku sugan Deegaanadii shalay dagaalada
xiriirka ku qabsadeen, waxaana Ciidamada ay yihiin kuwo ku go'doonsan
halkaas, waxana halkaasi ka taagan cabsi ku aadan in mar kale dagaal
uu dhex maro.

Wararka ayaa sheegaya in Ciidamada ku ay sugan yihiin qeybo ka mid ah
Gobolka Shabellaha Hoose, kadib markii dagaalo ay la galeen Xoogaga Ka
soo horjeeda oo weeraro is daba joog ah ku soo qaadayeen intii ay ku
safrayeen wadadaasi.

Xoogaga Kacdoonka oo aad ugu badan wadadaas ayaa ku sugan meel aan ka
fogeyn, waxaana ay ku dhirirsan yihiin Deegaanada Howdka ah ee hareer
mara wadada isku xirta Muqdisho iyo Baydhabo.

Waxaa gebi ahaanba xayiran gaadiidkii isticmaali jiray Muqdisho iyo
Baydhabo kadib markii wadadaasi uu dagaal ka dhacay, isla markaana ay
ciidamada fariisin ka dhigteen, waxaana gaadiidka oo ah kuwo isugu
jira rakaab iyo kuwo xamuulba ku adag inay tagaan Meelaha ay ku
jeedaan oo ah Muqdisho iyo Baydhabo.


Max'ed Ibraahin Raage
Saylac.Com Muqdisho Somalia.