|
|
 |
|
| |
Culimaa udiinka iyo Abwaanka
Somaliland maxay uga hadli waayeen marxalada adag ee
lagu jiro Roob doonta miyeyna nabadgelyadu ka
horeyn.?
April,24,2008
Kuwait(Saylac.com) Umada Somaliland waxa dhexdooda
qaali ku ah labada qof ee kala ah Abwaanka iyo
Caalimka Diinta. Labadan qof oo runtii tariikhda
dalka markaad dib u eegtid kaalin weyn ka soo qaatey
dhexdhexaadinta iyo nabad raadinta khilaaf badan oo
umadani soo martey iyo waliba wacyigalinta haday
noqon lahayd nabad iyo dagaal sharciga waafaqsan oo
lagula dagaalamayo gumaysigii Ingiriiska intaba.
Kaalinta Abwaanka hadaanu ku horeyno wuxuu ahaa
qofka kaliya ee erayadiisa lagu nabad galo
ama lagu dab galo labadaba, waayo waxa jirta
mar uu dagaal dadka u abaabulo dadkuna ay eray cid
kale weydiinin isaga erayadiisana ku dagaal galaan.
Dhinaca kale Marna waa nabad raadiye dhexdhexaadiya
umad cid kale u taagweydey waana hanuuniye shacabku
u dhego nugul yahay. (waxaaban ku sifayn karnaa
Abwanku inuu la mid yahay geedka dacarta oo
laantiisuna ay qadhaadh tahay dhubuqiisuna uu macaan
yahay).
Kaalinta Caalimka Diinta: Inta tariikhda soomaalida
la hayo wali Culimaa'udiinkusi maanu helin fursad
xoriyad usiinaysa inuu kaalin weyn ka qaato arimaha
aanu kor ku soo sheegney ee khuseeya arimaha
bulshada iyo dhexdhexaadintoona waxana ka
horjoogsaday xukumadaha soomaaliyeed oo dhamaantood
Cilmaani ku ababay diintana dhinac isakaga firkiyey.
Inkastoo ay Culima'udiinku sidaa ahaayeen, Hadana
kumay dhex milmin dadka intiisa kale ee masaajiida
iyo xarumaha diinta ayey shacabka diinta ugu dhigaan
iyagoo banadaa aan faragalin wixii xukum sharci ah
ku lugleh.
Culimaa'udiinku eedmalaha ayaanu odhan karnaa waayo,
dadka soomaalidu wali ma garan inuu wadaad ahmiyad
dhexdooda ku yeelan karo taana waxa kuu cadaynaysa
tirada ay xukumad kasta oo soomaalidu dhexdooda ka
samaysato ay ku leeyihiin wadaadadu.
Hadaanu usoo noqono su'aashan qormadu ku bilaabantey-
waxa iska cad inay labadan qolo ee Abwaanka
iyo Caalimka Diintu ay labaduba ku
jiraan xukumada soomaaliland iyo mucaaradka labadaba
hadana marnaba arki maysid abwaan ama sheekh is
baraxa oo mawqifkiisa dadka u sheega! Hadaba ciladu
halkay ka socotaa? waa jawaab iska cad- Abwaanka
Caanka ah ee Hadrawi ayaad arkaysaa isagoo ka qayb
galaya shirarka xisbiga Kulmiye qabto lakiin
wacyigalinta uu ka geysto ay xadidan tahay isagoon
marnaba aan dawlada uu ka horjeedo ee Dahir Rayale
uu madaxda ka yahay aan si cad wax uga sheegin.
Sidoo kale Culimaa Udiinka qaar ka mida ayaa dawlada
Somaliland aad u tageersan lakiin aan marnaba muujin
nacaybka ay u qabaan xisbiga kulmiye.
Hadaba kala baqan la kala baqayo ee iska cad ayaa
wuxuu sababay inuu keeno in labada qolo ee Dawlada
iyo Mucaaradku uu midwalba geestii iska dhaadhiciyo
inuu isagu sax yahay -sababtuna waxay iyagoo labada
waa dawlada iyo xisbiyada mucaaradka ahe ay haystaan
damaanad daliil ku qorantay oo ay ka heleen Abwaanka
iyo Culimaa'udiinka kala tageersan.
Akhriste bal inyar u fiirso maxaa dhici lahaa hadii
ay maanta Culimaa'udiinta iyo Abwaankuba ay warka
shaaca ka cadeeyaan kii labada dhinac khaldana ay
runta gacanta ka saaraan?? Xal kaamil ah ayaa dhici
lahaa kii diidana umada dhexdooda khaladkiisu ma sii
taabo galeen inuu waddanka iskaga cararo iyo inuu
khaladkiisa qaato dadkana ka mid noqdo miduunbay
ahaan lahayd.
Inkastoo ay aad u adagtahay in qaraar adag oo
mawqifkooda ku saabsan looga helo Abwaanka iyo
Caalimka diinta, hadana dadweynaha sharafta leh ee
Soomaaliland aad ayey u quudaraynayaan in la helo
dhexdhexaadin mugleh oo ay galaan Abwaanka iyo
Culimaa 'udiinku.
Mar hadii Gurtidii lagu tiriyey inay xukumada
u xagliyeen Intayna arini faraha ka bixin is-xagxagasho
kasta iyo far isku fiiq sii daba dheeraada ka hor
waxa dadka nabada jecel ee reer Soomaaliland ay
Culimaa'udiinka iyo Abwaankaba ku dhiiri galinayaan
marka hore inay labadooduba madaxbanaani ay ka
madaxbanaanyihiin tageerada labada xisbi ee UDUB iyo
KULMIYE ay helaan ka dib ay mawqif cad gadhaan
dadkuna iyaga ayuu ku daba faylayaa dhinicii loo
bato ee xaqu ku jiro ayaanu u wada aguugi doonaa
khalad la isku taageeranaa halkaa ayuu ku hadhayaa,
hadii kale markay furka tuurto wacdi iyo geeraar
midnaba nabad degdega laguma gaadho.
Ismahan Nuur
Saylac.com
Kuwait
aragtida dhinacaaga aad aaminsan tahay ku doo dir saylacnews@yahoo.com
|
|
|
