|
Axad wararka
Soomaaliya..Oct,26,2008
Qaar ka tirsan Ciidamada Booliska
oo si xun ugu dhaawacmay qarax lagula eegtay
Isgoyska 4-ta Jardiino ee magaalada Muqdisho.
Oct,26,2008
(Muqdisho:Saylac.Com)-Ciidamo ka tirsan Booliska
Soomaaliya ayaa goor dhoweyd si xun ugu dhaawacmay
qarax xoogan oo ahaa Miino kuwa meelaha fog fog lagu
aaso.
Qaraxan oo ahaa Miino xilli hore dhulka hoostiisa
loogu aasay Geed ay hoos fadhiisan jireen Ciidamada
Booliska oo lacago Leejo ah Gaadiidka kaga qaadayay
Isgoyska 4-ta Jardiino ayay la kacday askartaas,
markii ay saakay usoo jarmaad tageen halkii ay horay
u fariisin jireen oo Barta Koontaroolka u aheyd.
Illaa Lix ka tirsan Askarta Booliska ayay la kacday
Miinadaasi, kuwaasoo soo gaaray dhaawacyo aad u
culusaa, oo qaarkood ku waayay Xubnahooda muhiimka
ah sida ay inoo sheegeen dad goob-joogayaal ah.
Sidoo kale dad rayid ah ayaa iyana qaraxaas ku
dhaawacmay, kuwaasoo aan tiradooda la sheegi karin,
hase ahaatee dhamaan dadkii ku dhaawacmay ayaa loola
carayay Cusbitaalka Keysaney ee Duleedka Muqdisho.
Qaraxan ayaa markii uu dhacay waxaa gebi ahaanba
istaagay dhaq dhaqaaqa gaadiidka ee marayay Isgoyska
4-ta Jardiino, waxaana durba goobta soo gaaray
Ciidamo Boolis ah oo rasaas u ridayay kolba meel.
Jini Boqor "C/llaahi Yusuf ha is casilo, inlee
horayuu ugu dhaartay in hadii Hal sano uu wax qaban
waayo uu is casilayo"Oct,26,2008
(Baydhabo:Saylac.Com)-Xildhibaan Cabdi Cabdulle
Saciid (Jini Boqor) ayaa kula taliyaya Madaxweynaha
Soomaaliya C/llaahi Yuusuf inuu is casilo, maadaama
uu sheegay inuu ku fashilmay waxyaabihii loo doortay.
Xildhibaanka oo xalay la hadlayay mid ka mid ah
idaacadaha magaalada Muqdisho isagoo ku sugan
magaalada Nairobi ee xarunta wadanka Kenya ayaa
sheegay in xiligaan ay muhiim tahay in uu xilka iska
casilo Madaxweyne C/laahii Yuusuf Axmed.
"Marka xilka Madaxtimada loo doortay waxa uu ku
dhaartay in hadii hal sano uu wax ku qaban waayo uu
xilka iska wareejinayo laakin ma uusan wareejin oo
xaalada dalka Soomaaliya waa ay ka sii dartay, waxaa
dhintay dad shacab ah la dhaawacay dad shacab ah,
kumanaan qof waa ay barakaceen C/llaahi waxaan
leeyahay waa fashilmee ha is casilo"ayuu yiri
Xildhibaan Jini Boqor.
Xildhibaanka ayaa sheegay in Dowlada KMG afar sano
ay ka shaqeyneysay gudaha dalka Soomaaliya isla
markaana aysan wax ka qaban xaalada dalka
soomaaliya,waxaana uu tilmaamay in dowlada KMG
dagaalo la gashay xoogaga islaamiyiinta ah
Hadalka ka soo baxay xidhibaan jini Boqor ayaa ku
soo aadaya xil baarlamaanka KMG uu intiisa badan u
baqoolay Magaalada Nairobi, halkaasoo la filayo in
IGAD uu kulan wada tashi ah uu la qaato Madaxda
Dowladda iyo Golayaasha Baarlamaanka iyo Xukuumada,
iyadoona shakiyo kala duwan ay ka soo baxayaan
Shirka IGAD ay ku baaqday, kaasoo labo maalin kadib
qabsoomaya.
Ciidamada Ethiopia oo oo xoolo dhaqato ku laayay
agagaarka Deegaanka Yaaqbariweyne ee gobolka Sh/hoose
Oct,26,2008
(Leego:Saylac.Com)-Ciidamada Ethiopianka ee shalay
dagaalka adag ku qabsaday agagaarka Tuulada
Yaaqbariweyn ee Gobolka Sh/Hoose ayaa halkaas ku
laayay dad xoolo dhaqato ah, kadib markii ay duqeyn
iyo toogasho u geysteen.
Meydadka Ilaa 8 ruux oo ay ku jiraan Haween iyo
caruur ayaa saakay lagu wadaa in laga soo qaado
goobta ay Ciidamada Ethiopianka ku dileen, iyadoona
ay ku baxeen dad deegaanka ee ku sugan Deegaanka
Leego.
Dadkan ay xasuuqeen Ciidamada Ethiopia ayaa ahaa
kuwo xoolo dhaqato ah oo ka ag dhowaa halkii lagu
dagaalamayay maalinimadii shalay, kuwaasoo ay si
bareer ah u toogteen Ciidamada.
Ciidamada Ethiopianka ee shalay dagaalka ku qabsaday
inta u dhaxeysa Leego iyo Yaaqbariweyn ayaa soo
gaaray meel u dhow Deegaanka Balidoogle, xili ay
socod lug ah ku marayay wadada ayaa hadana Ciidamada
ay yihiin kuwo meel walba ku hakanaya, iyagoo ka
cabsi qaba in dagaalo ay la kulmaan.
Isku socodka Gaadiidka isaga kala goosha Gobolka Bay
iyo Banaadir ayaa maalintii labaad hakad ku jiray
waxanaa gaadiid ka soo baxay shalay Magaalada
Baydhabo uu ku xayiran yahay wadada, waxaana jirta
cabsi ah in Ciidamada waxyeeleeyaan dadka rakaabka
ah, sida horay looga bartay.
Ciidamada Ethiopia ayaa caado u ah inay laayaan dad
rayid ah, marka weeraro lagu xanuujiyo, kaasoo ka
soo gaarta dhimasho iyo dhaawac, waxaana marka ay
dhamaadaan weerarka ay geystaan tacadiyo ka dhan ah
bani'aadanimada oo isugu jirta dil, jirdil iyo dad
ay si bareer ah u bireeyaa.
Kolonyo Ciidamo Ethiopian oo saakay qarax lagula
eegtay agagaarka Deegaanka Carbiska ee Degmada
Afgooye Oct,26,2008
(Muqdisho:Saylac.Com)-Qarax xoogan ayaa xalay waxa
uu ka dhacay inta u dhaxeysa deegaanka Carbiska iyo
baar ismaal kadib marekii qarax mino lala eegtay
ciidamada Ethiopia oo roondo ka waday xaafadaasi.
Ciidamada Ethiopia ee Qaraxa lala beegsaday ayaa ah
kuwii fariisinka ku lahaa degmada Afgooye kuwaasi oo
howl roondo ah ka waday gudaha degmada Afgooye.
Wararka laga helayo gobolka Sh/hoose ayaa sheegaya
in Ciidamada Ethiopia uu soo gaaray qasaaro nafadeed
balse aan la ogeyn Qasaaraha inta uu la egyahay.
Qaar ka mid ah dad ku soo safray wadadaasi ayaa
sheegaya in ay ku arkeen goobta uu qaraxu ka dhacay
dhiig iyo tuutaha ay leeyihiin Ciidamada Ethiopia.
Cabsi xoogan ayaa soo wajahday dadka ku dhaqan
degmada Afgooye xili Qaraxyada iyo dagaalada ay ku
soo badanayaan qaraxyada ka dhanka ah Ciidamada
Ethiopia iyo kuwa Dowlada KMG.
Xaalada degmada Guriceel oo degan kadib markii
xalay lagu dilay Haweeneydii ugu horeysay oo ka
tirsan hay’adaha Samafalka. Oct,26,2008
(Guriceel:Saylac.Com)-Xaalada Degmada Guriceel ayaa
saakay u muuqata mid degan, iyadoona ay ka socoto
qaban qaabada aaska Haweeney Sama fal aheyd oo xalay
ay toogasho ku dileen Wiilal Dhalinyaro oo ku
hubeysnaa Bastoolad.
Dadka ku dhaqan Magaalada ayaa walaac xoogan ka
muujiyay dilkan arxan darada ah ee markii u horeysay
lagula kacay qof Dumar ah oo ka tirsan Hey'adda IIDA
oo ka mid ah Hey'adaha Sam falka ee u gar gaara
shacabka Soomaaliyed
Dadweyne fara badan ayaa saakay isugu soo baxay
Degmada Guriceel ee gobolka Galgaduud, kuwaasoo
doonaya inay ka qeyb qaataan Aaska Marxuumad Duniyo
Sheekh Doon oo madax u aheyd Hey'adda IIDA qeybteeda
Degmada Guriceel ee Gobolka G/Gaduud.
Waa gabadhii ugu horeysay oo Hay’adaha Bulshada
Rayidka u shaqeynaysay oo la dilo tan iyo Markii
Dowladda Soomaaliya soo gaartay gudaha dalka Xiliga
dilka loo geysanayay Gabadhan ayaa la sheegay in
haweenaydani ay ku sii jeeday gurigeeda waxaan lagu
hortoogtay Masjidka caanka ah ee masjidul Jaamac ee
magaalada Guriceel ee gobolka Galgaduud.
Lama oga sababta loo dilay, cidna ma sheegan
dilkeeda, waxaase dilkan uu ka mid yahay falalka
lagu ugaarsado Shaqaalaha Samafalka iyo Shaqsiyaadka
u shaqeeya Bulshada Soomaaliyed, kuwaasoo
mudooyinkii u dambeeyay lagu dilayay Magaalooyinka
Soomaaliya, waxaana dilkan haweeneydan loo geystay
ayaa dad badan oo soomaaliyed ku reebaya uur ku
taalo iyo murugo xoog leh
Ha’ayada IIDA waa hay’ad ka shaqeyso ka hortaga
musiibooyinka iyo arimaha haweenka taasi oo ka
howlgasha gudaha dalka Soomaaliya waxayna isku
xirtaa inta badan haweenka ka shaqeeya oo ku
howlgala qaar ka mid ah wadamo African ah oo ay ku
midoobeen haweenka African ah iyo kuwa kale oo ka
dhisan dalka Talyaaniga.
Max'ed Ibraahin Raage
Saylac.Com Muqdisho Somalia.
|
