|
|
 |
|
| |
Khasaaraha dhimasho iyo
dhaawac ee ay gaysteen duqayntii Ciidamada Yugaandha
oo sii kordhaya
.Sept,28,2008
(Muqdisho:Saylac.Com)- Duqayntii cadowtinimada iyo
doqonnimada ku dhisnyad ee ay gaysteen ciidamada
Dowladda Yugaandha ayaa sii kordhaya.
Ilaa iyo 12-qofood oo rayid ah oo ku dhawacmay
duqeyn ay ciidamada AMISOM shalay u geyteen suuqa
Weyne Ee Bakaaraha ayaa ugu geeriyooday 24-kii saac
ee laga soo gudbay cisbitaalka Madiina ee magaalada
Muqdisho.
12-kaan qof ayaa ka mid ahaa dadweyne aad iyo aad u
fara badan oo ku dhaawacmeen duqayntii waxashnimada
lahayd ee ciidamada Yugaandha ay maalimihii aan soo
dhaafnay u gaysteen dadweyne Soomaaliyeed oo aan
waxba galabsan,
Wararka ka imaanaya Cisbitaallada kala duwan ee
Magaalada Muqdisha ayaa sheegaya in ay jiraan
bukaanno kale oo aad u fara badan duqaymahaasi ku
dhaawacmay ay xaaladahooda caafimaad tahay mid wali
aan la sii qiyaasi Karin waxa ay ku
dambayndoonto,iyadoo dhaawacyada qaarkood ay
xaaladoodu yihiin kuwo aad u liita.
Dadka heysta Baasaboorada
Dalalka Reer Galbeedka oo ku go'doosan Magaalada
Muqdisho. Sept,28,2008
(Muqdisho:Saylac.Com)- Kadib Go'aankii xoogag Al-shabaab
ay ku xireen Garoonka Diyaaradaha Muqdisho ee Aadan
Cadde Air Port ayaa waxaa talaabadaas ay aad u
saameysay dad ka yimid Dhinaca Dalalka reer
Galbeedka oo hawlo shaqo iyo booqasho u joogay
Muqdisho.
Dad badan ayaa la arkaayey maanta iyagoo isu
diyaarinaya safar dhanka Dhulka ah oo ay ku gaaraan
Dalalka Ethopia iyo Kenya , waxaana ay cabsida sii
xoogeysatay markii Go'aankaas uu dhaqangalay, isla
markaana dhowr jeer la weeraray Diyaarado damacsanaa
inay bilaabaan Howlaha Rakaabka.
Garoonka Diyaaradaha Aadan Cadde oo xilligan u
muuqda mid howlihiisa ay gebi ahaanba istaageen,
ayaanu ka jirin wax rajo oo laga qabi karo inay dib
u bilowdaan Howlaha duulimaadka.
Dadka heysta Baasaboorada Dalalka Reer Galbeedka
ayaa qaarkood ka cabsi qaba inuu Baasaboorka ka
dhaco, waxaaa qaar ka mid ah dadkasi oo aan la
kulanay ay ka deyriyeen safar dhinaca lugta ah oo ay
ku tagaan Dalalka deriska ah si ay uga sii gudbaan.
Sidoo kale waxaa jira dad iyana doonayay inay soo
cumreystaan, kuwaasoo iyana la soo sheegayo inay u
weecdeen Magaalada Hargeysa ee maamulka Somaliland,
waxaana Garoonka Diyaaradaha ee Magaaladaas xilligan
laga dareemayaa mashquul badan.
Dowladda TFG-da ayaa waxay sheegtaa in Garoonka uu
furan yahay, isla markaana ay diyaaradaha ka soo
degi karaan, taasi oo ku andacooneysa in amaanka uu
sugan yahay.
Laakiin taasi ayay dad badan u arkaan mid afka
kaliya ku kooban oo aaneey ficil muuqan, kadib
markii tiro dhowr jeer duqeymo xoogan lagu qaaday
Garoonka, taasi oo lagu adkeynayay sii xirnaanshaha
Garoonka Diyaaradaha.
Garoonka Diyaaradaha Muqdisho oo 18-kii sano ee la
soo dhaafay u xirnaa Hogaamiye Kooxeedyo is diidanaa,
ayaa waxaa dib u furay Maxkamadihii islaamiga
sanadkii 2006-da, waxaana xilligan uu muqdaa xaalada
garoonka mid ku laabanaya xilligiisii hore oo ay
isaga soo horjeedeen Kooxo is diidanaa, hadana ay
labo dhinac oo iska soo horjeeda ay isu diidan
yihiin isticmaalkiisa.
Maamulka Islaamiga Kismaayo oo
ka soo baxay Amar lagu mamnuucayo Goobaha ganacsiga
in la furo Xilliyada Salaadaha.
Sept,28,2008
(Kismaayo:Saylac.Com)- Maamulka Islaamiga ee dhowaan
loo yagleelay Magaalada Istiraatiijiga ah ee
Kismaayo ayaa soo saaray go'aan cad oo lagu
mamnuucayo furnaanshaha Goobaha ganacsiga xilliyada
Salaadaha.
Hadal uu saxaafada u aqriyey Afhayeenka maamulka
Kismaayo Sheekh Xasan Yacquub ayaa sheegay in
maamulka ay go'aansadeen in la adkeeyo waajibaatka
salaada maadaama ay tahay mid ay horay u adkeeyeen
in la oogo ALLAH iyo Rasuulkiisa Muxamed (NNKH).
"Waxaan haatan ku dhawaaqnay in aan mamnuucnay
laakin waxaan qaadi doonaan talaabo ficil ah oo aan
uga hor tageyno dadka ka dhaga adeega ammarkaan,
waxaana dhici doonta in aan ku ciqaabno cidi u
hogaan sami weysa amarka ah in la xiro goobaha
ganacsiga ah xiliga salaada, ujeedadeenu waa in aan
raacno dariiqii Nabigeena (NNKH) isla markaana la
camro goobaha cibaadada"ayuu yiri Sheekh Xasan
Yacquub
Sidoo kale waxaa ay sheegen maamulka in ay sameyn
doonaan ciidamo gaar ah oo loogu tala galay in ay
ilaaliyaan goobaha ganacsiga isla markaana ku gaaf
wareega suuqyada iyo meelaha kale ee gancsiga marka
la gaaro xiliga salaada.
Magaalada Kismaayo oo ay gacan ku heynteeda bil ka
hor ay la wareegeen Xoogag Isbaheysato Islaamiyiin
ah ayaa waxay Magaalada ka dhaqan geliyeen
shareecada islaamka, iyadoona shalay ay Magaalada
kaga dhawaaqeen Waaxda garsoorka iyo Maxkamad taasi
oo qaadi doonta dawacadaha kala duwan.
Waa markii ugu horeeysay oo ay maqlaan dhagaha
shacabka Soomaaliyeed amarka ah in goobaha ganacsiga
ah la xiro marka la gaaro waqtiyada salaadaha
waajibka ah mudo 2- sano, horay ayay sidaan oo kale
ugu dhawaaqeen maamulkii maxaakiimta Islaamka
sanadii 2006 gaar ahaan magaalooyinkii ay ka arimin
jireen.
Maraakiib Dagaal oo ay
leeyihiin Mareykanka iyo Ruushka oo sheeda ka
ilaalinaya Markabka shixnada Hub sida ee afduubka
loo heysto.
Sept,28,2008
(Xarardheere:Saylac.Com)- Maraakiib dagaal oo ay
leeyihiin Dalalka Mareykanka iyo Ruushka ayaa ku
daba jira Markabka Shixnada Milateri u sida Dowladda
Kenya kaasoo labo maalmood ka hor ay afduubteen
Kooxo Burcad badeed Soomaali ah.
Markabkan afduubka loo heysto oo ay saaran yihiin
21-shaqaale ayaa shalay soo gaaray Xeebta Degmada
Xarardheere, waxaana Maraakiibta Quwadaha shisheeye
ay yihiin kuwo sheeda ka ilaalinaya Markabkaas.
Diyaarado qumaatiga u kaca ayaa dul heehaabaya
Markabka afduubka loo heysto, waxaana gebi ahaanba
ay xanibeen in Markabka loo soo dhowaado, waxana
jirta cabsi ah in howl gal milateri ay fuliyaan
Maraakiibtaas Dagaalka.
Afhayeen u hadlay Burcad badeedka ayaa ka digay in
loo soo dhowaado Markabka ay afduubka u heysteen,
waxana ay sheegeen in aysan wax cabsi ah ka qabin
Maraakiibta dagaalka ee quwadaha shisheeye.
Dowladda Kenya ayaa iyadu ku talisay in Markabka
hubka saaran aan laga dejin, iyadoona muujisay wal
walka ay ka qabto hadii hubkaas uu u gacan galo
Kooxaha Islaamiyiinta Soomaaliya ee Kacdoonada wada.
Kooxaha Burcad badeedka ayaa dalbaday Lacag Madax
furasho oo xoog leh, waxaana ay sheegeen in
35-milyan oo doolar ay ku doonayaan inay ku sii
daayaan Markabka, waxaana ay xuseen in lacagtaas ay
ka qiimo badan tahay Hubka faraha badan ee saaran
Markabka.
Isbaheysiga Dib u Xoreynta Garabka Sheekh Shariif oo
ku eedeeyay AMISOM in ay xasuuqeen shacab ku sugnaa
Suuqa Bakaaraha
Sept,28,2008
(Jabuuti:Saylac.Com)- Isbaheysiga Dib u xoreynta
garabka uu hogaamiyo Sheekh Shariif ee fariisinkoodu
yahay Magaalada Jabuuti ayaa war saxaafadeed ay soo
saareen ku cambaareeyay xasuuq ay sheegeen in
Ciidamada AMISOM ka geysteen Suuqa Bakaaraha.
War saxaafadeedka oo ka soo baxay Waaxda Warfaafinta
ee Isbaheysiga Dib u xoreynta ayaa waxaa lagu
muujiyay sida uu Isbaheysiga uga xun yahay
tacadiyada iyo xasuuqa ay bilaabeen Ciidamada AMISOM,
waxaana ay ku tilmaameen mid aad arxan daro u ah.
Isbaheysiga ayaa faray Ciidamada AMISOM inay
ilaaliyaan xuquuqda dadka, isla markaana ka
digtoonaadaan falalka waxashnimada ah ee ay
geysanayaan.
Sidoo kale Odayaasha Dhaqanka Beelaha Hawiye ayaa si
kulul u cambaareeyay Ciidamada AMISOM, iyagoo
sheegay inay la mid noqdeen Ciidamada Ethiopia oo
looga bartay Falalka Xasuuqa.
Afhayeenka Dhinaca Siyaasada ee Isbaheysiga Dib u
Xoreynta ayaa sheegay in wax laga xumaado ay tahay
in Ciidamada AMISOM ay hareer maraan howl ka baxsan
waxyaabihii loogu soo diray Soomaaliya.
Maalinimadi shalay ayaa Taangiyo ay leeyihiin
Ciidamada AMISOM oo soo istaagay meel u dhow Suuqa
Bakaaraha gaar ahaan Isgooyska Sayidka , ayaa duqeyn
xoogan ka geystay, waxaana duqeyntan ay tahay tii
4-aad oo ay Ciidamada AMISOM ka geystaan Caasimada
Soomaaliya tan iyo markii ay soo gaareen bilowgii
sanadkii hore.
Max'ed Ibraahin Raage
Saylac.com Muqdisho Somalia.
|
|
|
