Sil silado Qaraxyo ah oo maanta gil gilay magaalada Baydhabo ee xarunta gobolka Bay.Nov,30,2008

(Baydhabo:Saylac.Com)-Qaraxyo dhimasho iyo Dhawacyo dhaliyay ayaa maanta xiliy is xig xigay mar qura gil gilay magaalada Baydhabo ee xarunta gobolka Bay oo fariisin kmg u ah Baarlamaanka Dowlada Embighati.

Illaa shan ruux ayaa geeriyootay, 18-kalena wey ku dhaawacmeen qaraxyo xoogan iyo tacshiirado ka dambeeyey oo barqanimadii maanta gilgilay Suuqa sarifka lacagaha qalaad ee magaalada Baydhabo ee gobolka Bay sida wararka halkaasi naga soo gaaraya ay Tibaaxayaan.

Qaraxyadan oo loo adeegsaday bam gacmeedyo iyo Miino ka mid ah kuwa meelaha fog fog laga hago ayaa la sheegay in lagu weeeraray ciidamo ka tirsan booliska Dowlada TFG-da oo ku sugnaa Suuqa sarifka lacagaha qalaad ee magaalada Baydhabo, waxaana qaraxyadan oo ahaa kuwo is xigxigay ka dib waxaa halkasi laga maqalay tacshiirad xoogan oo ay furayaan ciidamada Dowlada TFG-da ee halkaasi ku sugnaa, waxana dadkii goobtaasi ka dhowaan ay isaga carareen marka laga reebo kuwa ay qasaaraha ka soo gaareen qaraxyada iyo tacshiirada ka dambeysay oo dhulka daadsanaa.

Daqiido ka dib ayaa goobta waxaa soo gaaray ciidamo hor leh oo ka tirsan maamulka gobolka Bay oo iskugu jira boolis iyo milateri kuwaasoo baaritaano ka bilkaabay goobaha ay qaraxyadu ka dhaceen,waxana ciidamada ay qaar ka mid ah sariflayaasha Suuqa magaalada Baydhabo ay u geeysteen dhac iyo boob ay kula dhaqaaneen hantidooda inkastoo aysan sheegin cadada ay dhan tahay, waxaana la arkayey ciidamada oo qab qabanaya dad gabaad ka dhiganayey goobo ganacsi oo halkaasi ku yaala isla markaana xabsiga u sii waday.

Xaalada magaalada Baydhabo ee gobolka Bay ayaa cakiran illaa hadda iyadoo dadka dhintay iyo kuwa dhaawacmay ay iskugu jira ciidamo ka tirsan maamulka iyo dad rayid ah ayaa la geeyey Isbitaalka magaalada Baydhabo, waxaana dadkaasi ay waxyeelo ka soo gaartay qaraxyadii ka dhacay halkaasi iyo tacshiiradii ka dambeysay ee ay fureen ciidamada Dowlada TFG-da,waxaana qaraxyadan ay yihin kuwii ugu qasaaraha badnaa ee maalmahan dambe ka dhaca magaaladaasi.

Qaraxyadani ayaa waxaa ay ku soo aadayaan xili inta badan maamulka gobolka Bay iyo kan degmada Baydhabo ay sheegeen in ay sugayaan ammaanka magaalada Baydhabo taasi oo dadka ay u arkaan in hadaladasi ay ku sii dheereeynayaan dhibaatada dhanka ammaanka ah.

Dad lagu soo qabqabtay ka ganacsiga iyo isticmaalka mukhaadaradka oo xukuno kala duwan oo tacsiir ah lagula fuliyey Baladweyne..Nov,30,2008

(Baladweyne:Saylac.Com)-Maxkamadaha islaamiga ayaa maanta meel fagaare ah xukun tacsiir ah ugu fuliyay Dad lagu soo qabtay ka ganacisiga Muqaadaraadka iyo isticmalkiisa gudaha magaalada Baladweyne ee xarunta gobolka Hiiraan.

Illaa shan ruux oo lagu eedeeyey iney ku lug yeesheen ka ganacsiga iyo isticmaalka noocyada kala gedisan ee mukhaaraadka loo yaqaano xashiishada ayaa xukuno tacsiir ah waxaa ku fuliyey ciidamada midowga maxaakiimta Islaamka ee ku sugan magaalada Baladweyne ee gobolka Hiiraan.

Saraakiisha midowga maxkamadaha Islaamka ee magaalada ayaa sheegay in shantan ruux lagu soo qabqatay howlgalo ay magaalada ka sameeyeen ciidamadooda xili ay ku guda jireen ka ganacsiga iyo isticmaalka noocyada kala gedisan ee maandooriyaha sida xashiishada iyo khamriga macmalka ah ee loo yaqaano Calaqda.

Labo ka mid ah shantaasi ruux ayaa waxaa lagu dhuftay min 20-karbaash oo tacsiir ah, halka 2 kale iyana lagu dhuftay min 15 kartaash, iyadoo midka shanaadna 30 Karbaash oo tacsiir ah lagu dhuftay, waxaana karbaashkaasi uu ka dhacay meel fagaaara ah oo ku taala magaalada Baladweyne iyadoo ay daawanayeen dadweyne fara badan oo ka mid ah magaalada Baladweyne.
Ciidamada Ethiopia oo maanta faarujiyey mid ka mid ah xeryihii ay mudada dheer ka degenayeen gudaha magaalada Baydhabo...Nov,30,2008
(Baydhabo:Saylac.Com)-Ciidamada Ethiopia ee dalka ku soo duulay ayaa barqanimadii maanta gebi ahaanba ka guuray xerada warshadii hore Oomada ee Xasey oo ku taala duleedka magaalada Baydhabo ee gobolka Bay sida wararka halkaasi naga soo gaaraya ay sheegayaan.


Ciidamadan Tigreega ah oo degenaa warshadii hore ee Xasey oo ku taala magaalada Baydhabo ayaa la sheegay iney ka ruqaansadeen halkaasi iyagoo wata illaa 10-gaari oo nooca ciidamada lagu daad gureeyo ah, taangiyo iyo gawaari nooca dagaalka ah.

Wararka ayaa sheegaya in ciidamadan ay u ruqaansadeen dhinaca wadada u baxda gobolka Gedo oo tagta xadka labada dal ee Soomaaliya iyo Ethiopia, waxaana wararkii ugu dambeeyey ay sheegayaan in ciidamadaasi sii socda ay ku sii dhowaayeen degmada Berdaale ee gobolka Bay oo ay ku xoogan yihiin kooxaha ka horjeeda ciidamadaasi.

Lama oga illaa hadda in ciidamadan Xabashida ah ee ka baxay magaalada Baydhabo ay halkaasi dib ugu soo laaban doonaan iyo in kale, waxana ay talaabadaasina ay ku soo beegantay xilli habeenimadii xalay ay soo gaareen magaalada Baydhabo ciidamo kale oo Ethiopiaan ah oo ka yimid dhinaca dalka Ethiopia.

Sidoo kale, talaabadan ay ciidamada uga baxeen qeybo ka mid ah magaalada Baydhabo ayaa ku soo beegantay xilli maalmo ka hor ay wasaarada arimaha dibada ee Ethiopia shaacisay iney ciidamada ka jooga Soomaaliya kula bixi doonto muddo bil gudaheed ah guud ahaantood.

Dadka siyaasada odorosa ayaa ka bixitaanka Ciidamada Xabashida ee gudaha dalka Soomaaliya ku micneeyay jab iyo dharbaaxyo soo food saartay ciidamadaasi oo kaga timid xoogaga ka soo hor jeeda oo dagaalo xoogan kala hor tagayay tan iyo markii ay dalka Soo gaareen.

Sheekh Shariif oo UN-ka iyo Midowga Afrika ugu baaqay in ciidamo badala kuwa Ethiopia ay u soo diraan dalka Soomaaliya...Nov,30,2008
(Jabuuti:Saylac.Com)-Gudoomiyaha Isbeheysiga Dib u xoreeynta Garbka Jabuuti Sheekh Shariif Sheekh Axmed oo kooxdiisa dhowaan heshiis awood qeybsi la saxiixatay Dowladda TFG-da ayaa markii u horeysay sheegay in loo baahan yahay Ciidamo dheeraad ah oo ka socda Midowga Afrika iyo Qaramada Midoobey si buu yiri ay u badalaan Ciidamada Ethiopia.

Sheekh Shariif ayaa ugu baaqay Midowga Africa inay soo diraan Ciidamo dheeraad ah oo gacan ka geysta xasilinta iyo nabad ku soo dabaalida dalka ay dagaalada la degeen ee Soomaaliya, isagoona u jeediyay inay eegaan heshiiska Jabuuti.