|
|
 |
|
| |
Axad: Wararka
maanta Dec,21,2008
Allaha u naxariisto Dr. Xuseen Xaaji Bood oo
waabarigii saaka ku geeriyooday Magaalada Nairobi.
Dec,21,2008
(Nairobi:Saylac.Com)-Allaha u Naxariistee waxaa
saakay Waaberigii ku geeriyooday Magaalada Nairobi
ee dalka Kenya Siyaasiga Soomaaliyed Dr Xuseen Xaaji
Maxamed Bood oo ka mid ahaa Siyaasiyiinta ku caan
baxay dhinaca Nabadda Soomaaliya
Allaha u naxariisto Dr. Xuseen Xaaji Bood sawir
laga qaaday intuu noolaa.
Siyaasiga Soomaaliyed Dr Xuseen Xaaji Bood oo in
badan ka mid ahaa Siyaasiyiinta ka dhex muuqday
Bulshada Soomaaliyed laguna xasuusto Kacdoonkii
Shacabka ee looga soo horjeeday Xukuumaddii Maxamed
Siyaad Barre ayaa waabarigii saakay ku geeriyooday
Magaalada Nairobi ee Caasimadda dalka Kenya, isagoo
maalmihii la soo dhaafay ku xanuunsanayay.
Geerida marxuumka ayaa xaqiijisay Marwadii uu ka
geeriyooday Marxuumka Xabiibo Xaaji Jimcaale,waxana
ay sheegtay in Bood uu geeriyooday saaka Abaaro 3:50
ee waqtiga Nairobi xiligaasi oo ay sheegtay in uu ku
laba lixaadsaday xanuun in mudo ah haayay.
Siyaasigii caanka ahaa Allaha u naxariistee Dr.
Xusee Xaaji Bood ayaa xanuunka uu u geeriyooday
waxaa u qabtay 23-kii bishii la soo dhaafay iyadoo
5-ta bishan loo qaaday Cusbitaal ku yaala magaalada
Nairobi ee dalka Kenya halkaasi oo uu saaka ku
geeriyooday
Marxuumka oo ahaa nin aqoonyahan ah, waxaa uu
siyaasadda ku soo dhex jiray muddo ka badan 30-sano
waxana uu ku caan baxay geesinimo, waxaana dad badan
ay ku xusuustaan markii Maxamed Siyaad Barre uu la
kulmay odayaashii Bayaankii Manifesto oo uu Siyaad
yiri YAAN KALA HADLAYAA KOOXAHA DAGAALKA WADA,uu Dr
Bood kaligiisa yiri aniga ayaa la igala hadlayaa, ma
jirin qof kale oo ku dhacday in ay xiligaasi ka
jawaabto hadalka Siyaad.
Dr. Xuseen Xaaji Bood ayaa ku dhashay Deegaanka
Mareeg ee Gobolka Galgaduud sanadkii 1935, waxaa uu
waxbarashadiisii Quraanka, Dugsiga Hoose iyo Dhexe
ku soo kala qaatay Mareeg iyo Ceeldheer, waxana uu
sidoo kele waxbarashadiisii Dugsiga Sare ku soo
qaatay Dalka Ethiopia, waxaa uu kaloo Jaamacada
culuunta Siyaasada kaga baxay Dalka Talyaaniga.
Marxuumka oo ahaa siyaasi fir fircoon ayaa shaqooyin
kala duwan ka soo qabtay Dowladihii hore waxaana uu
u soo shaqeeyay Wasaaradii Horumarinta, Wasaaradii
Qorsheynta iyo howlo qaran oo uu u soo qabtay Dalka
Marxuumka allaha u Naxariistee Dowladdii Carte lagu
soo dhisay waxaa uu ka noqday Ra'iisul Wasaare
kuxigeen, waxaa u mar noqday Guddoomiyihii Golihii
Wadatashiga Soomaaliyed, ka hor waxaa uu ahaa Xuseen
Bood kuxigeenadii Cali Mahdi Maxamed Guddoomiyihii
USC/SSA.
Xuseen Bood Wax caruur ah ugama tagin ifka, hase
yeeshe waxaa uu lahaa hal Xaas taas oo ay ahayd Drs
Xabiibo Xaji Jimcaale, sida laga soo xigtay qaar ka
mid ah Qoyskiisa waxaa la filayaa Dr Bood in lagu
aaso dalka oo meydkiisa laga soo qaado Magaalada
Nairobi.
Dowladda Ethiopia ayaa sheegtay in 10-ka maalmood ee
ka harsan bishan December ay kula bixi doonto
Ciidamadeeda.Dec,21,2008
(Addis Ababa:Saylac.Com)-War laga soo saaray
Wasaarada Arrimaha Dibeda Ethiopia ayaa lagu sheegay
in 10-ka maalmood ee ka harsan Bishan December
dhamaadka sanadkan ay Ciidamada Ethiopia ee ku sugan
Gudaha Soomaaliya ay la bixi doonto.
Sida ay baahisay Wakaalada Wararka ee AFP oo soo
xiganeysay Saraakiil ka tirsan Wasaarada Arrimaha
Dibeda Ethiopia ayaa lagu sheegay in ay diyaarisay
Dowladda Ethiopia qorshihii ay Ciidamadeeda ugala
bixi laheyd, waxaana ay tilmaantay in aanay ka laba
labeyn doonin go'aankeeda ahaa inay kala baxeyso
Ciidamadeeda.
Warbixinta Wasaarada ayaa sidoo kale lagu sheegay in
iyadoo la tixgelinayo Heshiiskii Jabuuti ay ku
gaareen Dowladda Embigti iyo Isbaheysiga Dib u
Xoreynta ay Dowladda Ethiopia ka go'an tahay inay
Ciidamadeeda la baxdo.
Dowladda Ethiopia ayaa sheegtay in aysan cadeyn
karin in ay sii joogayaan Ciidamada AMISOM iyo in
kale hadii ay baxaan, waxaana ay tilmaantay in la
soo buuxiyo tirada Ciidamada AMISOM ee horay loogu
balan qaaday 8-kun balse haatan ay ka joogaan wax ka
yar 2-kun oo askari.
Inkastoo ay dhamaatay 120-kii Maalmood ee dhigayay
Heshiiskii Jabuuti oo aheyd in Ciidamada Ethiopia
uga baxaan gudaha Soomaaliya ayaa saan saanta
arrinkaas aysan muuqan.
Wariyeyaasha ka faalooda arrimaha siyaasada ayaa
sheegaya in aysan wali muuqan tallaabo dhab ah oo
Dowladda Ethiopia Ciidamadeeda ugla baxeyso, marka
laga reebo hadalada ka soo yeeraya Mas'uuliyiinta
Ethiopian-ku oo ah inay kala baxayaan Ciidamadooda.
Ethiopia waxay la daalaa dhaceysaa kacdoonada iyo
dagaalada xoogan ee kaga imaanya xoogaga ka soo hor
jeeda ee aan dhamaadka aheyn ee ka soconaya
Soomaaliya, kaasoo ay kala hor imaanayaan xoogagaasi
oo diidan joogitaankoda Soomaaliya, waxaana
Ciidamada Ethiopia ay si rasmi ah ugu riiqmeen
colaada ka aloosan Soomaaliya, gaar ahaan Caasimada
Muqdisho.
Kolonyo ay la socdeen
Ciidamada AMISOM oo saaka lagu weeraray inta u
dhaxeysa KM4 iyo Garoonka Diyaaradaha.
Dec,21,2008
(Muqdisho:Saylac.Com)-Qaraxyo iyo tacshiirad ayaa
saaka lagu weeraray Kolonyo Ciidamada AMISOM la
socdeen xilli ay marayeen inta u dhaxeysa isgooska
KM-4 iyo Garoonka Diyaaradaha, halkaasoo marin u ah
Ciidamada, isla markaana aroor walba ka sameeya
howlo miino baaris ah.
Wararka ayaa sheegaya in Qaraxyada oo ahaa Bam
gacmeed lagu weeraray Kolonyada Ciidamadaas ay sidoo
kale xigtay is rasaaseyn dhex martay Kooxaha
Hubeysan ee weerarka ku soo qaaday Kolonyada
Ciidamada AMISOM.
Inkastoo aan la xaqiijin karin qasaaraha ka dhashay
iska hor imaadkaas iyo qaraxyada xiriirka ah ee bam
gacmeedka ka dhashay ayaa warar qaar sheegayaan in
Ciidamada AMISOM ay ku faafeen Xaafadaha u dhow
Garoonka Diyaaradaha.
Ciidamada AMISOM ee ku faafay Xaafadaha ayaa la
sheegay inay rasaas ku fureen dad rayid ah, taasoo
keentay dhaawaca 3-ruux, waxaana la ogeyn qasaaraha
kale ee ay geysatay rasaas kale oo ay furayaan
Ciidamada.
Isku socodka gaadiidka iyo Ganacsiga ee inta u
dhaxeysa KM-4 iyo Garoonka Diyaaradaha ayaa hakad
galay, markii ay halkaas ku soo faafeen Ciidamada,
sidoo kale dadka deegaanka ayaa iyana bilaabay inay
kala firxadaan, qaarna ay guryahooda ku nagaadaan.
Ma jirto ilaa iyo hada afhayeen u hadlay Ciidamada
AMISOM oo ku aadan weerarkii saakay lagu qaaday
Kolonyada Ciidamadooda, waxaana sidoo kale la ogeyn
hadii uu qasaare ka soo gaaray weerarka isugu jiray
bam gacmeedka iyo iska hor imaadka xigay.
Maxay ka wada hadleen Senator-ka Mareykanka, Sheekh
Shariif iyo Ra'iisul Wasaare Nuur Cadde iyo Daahir
Riyaale.Dec,21,2008
(Jabuuti:Saylac.Com)-Iyadoo shalay safaaradda
Maraykanka ee magaalada Jabuuti ay ka dhaceen kulamo
gooni gooni ah oo uu Senator-ka aqalka cad ee
Maraykanka u qaabilsan arrimaha Africa Russ Feingold
la qaatay madax ka tirsan Soomaalida ayaa waxaa ka
soo baxaya faah faahin dheeri ah.
Senator-kan Mareykanka ayaa la kulmay Gudoomiyaha
Isbaheysiga Dib u Xoreynta Sheekh Shariif, Ra'iisul
Wasaaraha Dowladda KMG Nuur Cadde iyo Madaxweynaha
Maamulka Somaliland Daahir Rayaale Kaahin.
Ra'iisul wasaare Nuur Cadde oo la hadlayay
saxaafadda ayaa sheegay in waxyaabihii ay kulankaasi
kaga wada hadleen Senator Russ Feingold ay ka mid
ahaayeen barnaamijka dib-u-heshiisiinta, sida suurto
gal u tahay in loo dhaqan geliyo, lana samata bixiyo
shacabka Soomaaliyeed ee dhibaataysan iyo arrimaha
burcad badeedda, wuxuuna intaasi ku daray in
dhinacooda ay faah faahin ka bixiyeen dadaalada
nabadeed oo ay wadaan, waxana uu hoosta ka xarriiqay
in senator-ku u ballan qaaday inuu hiil iyo hooba la
garab taagan yahay barnaamijyada nabadda loogu
raadinayo dalka Soomaaliya.
Sidoo kale Sheekh Shariif Sheekh Axmed Gudoomiyaha
Isbaheysiga Dib u Xoreynta oo isna saxaafada uga
warbixiyay Kulanka gooniga ah ee uu la qaatay
Senator Russ Feingold ayuu sheegay in kulankoodu uu
ku saabsanaa intiisa badan barnaamijka dib u
heshiisiinta maadaama la gaaray waqtigii ay
ciidamada Ethiopia ka bixi lahaayeen dalka
Soomaaliya, wuxuuna intaasi ku daray in senator-ku
aad uu ugu baaqay dhinacyada kale ee Soomaalida ee
aan qayb ka ahayn wada hadallada nabadda inay ku soo
biiraan.
Xubin ka tirsan Isbaheysiga Dib u Xoreynta oo ka mid
ahaa Xubnaha la kulmay Senator-ka oo lagu magacaabo
Tarzan ayaa isna sheegay inay su'aalo iyo jawaabo
kala qaateen, wuxuuna senator-ka sheegay sida ay u
arkaan hadii wada hadalada lagu soo biiriyo Garabka
Xasan Dahir uu hogaamiyo.
Senator-ka ayaa walaac ka muujiyay is ballaarinta
Kooxda Alshabaab ka wado gudaha Soomaaliya,waxana uu
sheegay inay muhiim tahay in Alshabaab laga soo qeyb
geliyo wada hadalka.
Qodobada kulamadaasi gooni gooniga ah looga hadlay
ayaa waxaa ay yihiin sidii uu maraykanku u badeli
lahaa siyaasadiisa ku aadan dalka Maraykanka
maadaama uu haatan maraykanku galayo wajji cusub iyo
madax cusub iyo sidii uu Soomaaliya ula shaqeyn
lahaa.
Jendayi Frazer oo dhex dhexaadineysa Madaxweyne
C/llaahi Yuusuf iyo Ra'iisul Wasaare Nuur Cadde
Dec,21,2008
(Nairobi:Saylac.Com)-Wararka ka imaanaya Magaalada
Nairobi ee dalka Kenya ayaa sheegaya in
Hogaamiyeyaasha Dowladda uu hor kacayo Cabdullaahi
Yuusuf ee labada garab u kala jabtay lagu wado inay
halkaas ku dhex dhexaadiso haweeney Mareykanka u
qaabilsan Afrika oo shalay gelinkii dambe halkaasi
gaartay.
Jendayi Frazer waa Kaaliyaha Xoghayaha Arrimaha
Dibeda Mareykanka u qaabilsan Arrimaha Africa,
sidaas darteed waxay dooneysaa inay meesha ka saarto
kala aragti duwananaashaha u dhaxeeya Madaxweynaha
iyo Ra'iisul Wasaarahiisa.
Wada xaajoodkan cusub ee ay Jendayi Frazer ka dhex
bilowday Madaxda Dowladda ayaa imaanaya iyadoona
iskaba daayee salaan uusan wada shaqeyn toos ah dhex
marin Labadan Mas'uul tan iyo wixii ka dambeeyay
markii ay isku maandhaafeen Siyaasada
Ra'iisul Wasaare Nuur Cadde ayaa lagu wadaa inuu
saacadaha soo socda tago Magaalada Nairobi, halka uu
Madaxweyne C/llaahi Yuusuf ku sugan yahay halkaas oo
uu shalay gelinkii hore gaaray.
Madaxweyne Yusuf ayaa jeebka ku wata Ra'iisul
Wasaare kale oo uu magacaabay, kaasoo la yiraahdo
Gacma Dheere, halka Ra'iisul Wasaare Nuur Cadde uu
isna jeebka ku wato Go'aanka Baarlamaanka ee uu
kalsoonida ku siiyay Xukuumadiinsa, iyadoona ay sii
u dheer in mowqifyadooda ah oo ah kuwo aad u kala
fog.
Ra'iisul Wasaare Nuur Cadde oo la hadlayay Idaacada
BBC-da Laanteeda afka Soomaaliga ayaa xaqiijiyay
inuu jiro kulan guud oo ay wada yeelanayaan isaga
iyo Kaaliyaha Xogahayaha Arrimaha Dibeda Mareykanka
ee dhinaca Africa, laakiin waxaa uu xusay in aanu
jirin kulan ay isugu imaanayaan saddexdooda, laakiin
wuxuu xusay in mid kasta uu goonigiisa ula kulmayo.
Dowladda Mareykanka waxay doonayaan inay arrinta
dejiyaan oo Labada nin khilaafkooda lagu dhameeyo
xeer jajab ama in mid walba tanaasul sameeyo, taasoo
aan la ogeyn sida labada nin ay ku aqbali karaan
inay ka tanaasulaan mowqifyadooda adag.
Max'ed Ibraahin Raage
Saylac.Com Muqdisho Somalia
|
|
|
