Dhegayso Codkii Maxbuuskii Lagu Gubay Sigaarka Maxbuus Farxaan Cabdi Xadi

Wajaale(Saylac.com) Muwaadinkan ayaa hada ka kor waxa si ula kaca sigaar qoorta ugu damiyey Taliyaha Booliska degmada Wajaale oo aan haba yaraatee ku haysan wax danbi ah oo uu galay muwaadinkani.
(Muwaadinka Jidh dilka iyo xabsiga loo geystey oo saxaafada tusaya qoortii sigaarka lagaga bakhtiiyey)

Sida foosha xun ee loola dhaqmay muwaadinkan waxa dareen cambaareyn ah horey uga soo jeediyey dadweyne fara badan oo u dhashay somaliland oo dunida ku kala baahsan waxayna dhamaan dadweynahaasi ku baaqayeen in Talihaya Booliska Wajaale sharciga u degsan Jamuuriyada Somaliland uu ku tuntey si ula kacna uu jidh dil ugu sameeyey muwaadinkan dada yar ee aan wax danbi ah oo uu galabsaday aanay jirin.

Sidoo kale Hay'da Amnest International oo sawirada jidh dilka loo geystey ay shabakada saylac.com u gudbisay ayaa sheegtey inay daba gali doonto jidh dilkan ka baxsan bani aadaanimadu isla markaana ay si toosa wax uga weydiin doonto xukumada somaliland.

Muwaadinkan oo maanta oo ay tariikhdu tahay Dec,19,2008 laga siidaayey jeel ku yaala degmada Gabiley oo uu in mudo ahba ku xidhnaa ayaa saylac.com u sheegay maanta xaalada qalafsan ee lagula dhaqmay iyo jidh dilka qaawan ee loo geystey oo uu sheegay inuu wali la ildaran yahay .


Waxa uu sheegey in silsilado si isdhaaf ah lugaha iyo gacmaha loogaga xidhay dabadeed sigaar qoorta la gaga damiyey dhawr jeer waxa kale oo uu sheegay in nudaha jidhka ee dahsoon laftooda jidh dil lagaga sameeyey isla markaana uu aad u liito waxa dhakhtar ahna uusan helin ilaa hada .


" Hadii uu jiro sharci dadka kala haga dalka somaliland waxaan dawlada ugu baaqayaa in dacwadayda la horkeeno maxakamada sare ee dalka si ninkii Taliyaha ahaa ee jidh dilkan gacmihiisa iigu geysay sharciga loo soo taago" ayuu yidhi Muwadin Cabdirahman Huseein oo saylac.com u waramayey.


Ilaa hada dhanka xukumada somaliland wax war ah oo ku saabsan fadeexadan jidh dilka loogu geystey muwaadinkan u dhashay Jamuuriyada Somaliland lama hayo waxase dadweynaha qurbojooga ee somaliland si wada jira ugu soo jeedinayaan xukumada dalku inayna dhayalsan jidh dilkan loo geystey muwaadin ka tirsan umada ay metesho.

Dahir Axmed Jirde
Wajaale, Somaliland