|
|
 |
|
|
Wakiillada: Doodii
wax-ka-bedelka xeerka doorashada Dawladaha Hoose
ee Somaliland.
April,07,2008
Hargeysa(Saylac.com)Golaha Wakiillada Somaliland
ayaa fadhigii shalay ka dooday mooshin 27-
mudane soo dhigeen Golaha oo nuxurkiisu ahaa in
wax ka badal lagu sameeyo xeerka Doorashooyinka
dawlada hoose oo Guurtidu dib ugu soo celisay
Wakiilada, Islamarkaana lagu meel mariyay lagu
in liis lagu xulo xubnaha golayaasha deegaanka u
ordaya.
Doodan oo ay ka qaybgaleen ilaa toban Mudane,
Islamarkaana maanta ka sii socon doonta Golaha
waxa mudanayaashii ka qaybgalay ka mid ahaa.
Xildhibaan Xaashi Xuseen Cabbi oo ku dooday
“Innagu (Gole Wakiilo ahaan) dariiq baynu
jeexnay iminka oo ah doorasho, Guurtidu way
innagu soo celisay. Guurtidu waxay inoogu soo
celisay inay dib inoo celiso ayay doonaysaa.
Waayo, Guurtida xageeda doorasho waa ka xaaraan.
Waxay doonayaan inay gurigii aynu ka soo guurnay
dib inoogu celiyaan. Dood badan uma baahna caqli
bay u baahan tahay, waa inaynu mooshinkan iyo
qaar la mid ahba ku badbaadinaa dalka iyo dadka.”
Xildhibaan Cabdiraxmaan Cismaan Caalin oo ka
qayb qaatay doodan ayaa isagana waxa hadalkiisii
ka mid ahaa oo uu yidhi. “Dadku meel ay u
raacaan codkoodii waa inay helaan. Waxay ku
tahay xisbiyada mudaro, waxay ugu tahay waxa
weeye waa inuu qofku xuquuqdiisa toos u helaa,
waa inuu raadsado codkiisa, oo uu ku soo baxo
awood dhab ah, cod dhab ah oo uu helay oo uu
dadku siiyay. Laakiin, liiska markay noqoto
xisbiyada waxay ku tahay mudaro, xuquuqda
muwaadinkana dhib wayn bay ku tahay,” Ayuu yidhi
Xildhibaan Cabdiraxmaan Dheere.
Xildhibaan Jaamac Xasan Aadan ayaa isaguna ku
dooday “Hadii uu liisku sidii hore nqodo intaan
doorashaba la gaadhin, ayaa waxa soo baxaya
natiijadii 90% marka nin lagu qoro liiska. Kow
ama Laba subaxaa waxa weeye Xildhibaan markaa
doorashada sabab loo qabanayaaba ma jirto, marka
liisku soo baxo ayay doorashada Golaha Deegaanku
dhamaanaysaa. Markaa, hadii liisba laga dhigayo
hala yidhaahdo xisbiyadow soo magacaaba, oo
kharashkan diiwaan-gelinta waxaas oo dhan ha
layska daayo, hadiise doorasho la samaynayo waa
inay doorashadu toos noqotaa. Sideenaas oo kale
waa in la qaanabaa qof la soo doortay, qof aan
la qaandhabayn oo aan cidi daba socon waa inaynu
waayo-aragnimadii hore aynu ku tashanaa.
Axsaabtu waxay xaq u leeyihiin inay wax
sharaxaan. Laakiin, xaq uma laha inay wax
doortaan, dadka ayaa xaq u leh inay doortaan
dadka xukumaya. Waxaan leeyahay waa in aan
doorashada deegaanka liis dambe lagu celin,
waana qayra dastuuri, haddii liis la sameeyana
ay dulmi tahay.”
Inta badan mudanayaasha ka qaybgalay doodani
isku mawqif ayay iska taageen arrintan,
Xildhibaan Axmed Ducaale Daahir ayaana ka mid
ahaa mudanayaasha ka qaybgalay dooda oo aan wax
badan kaga duwanayn xildhibaada ka horeeyay
waxana hadalkiisii ka mid ahaa oo uu yidhi.
“Liisku doorasho maaha. Markii hore ee liiskan
la samaynayay waxaan qabaa in loogu talo-galay
in xisbiyadu ku kala baxaan, ee dad looma
dooranayn, xisbiyo ayaa loo dooranayay.
Maanta xisbiyadii way jiraan, waxaana loo baahan
yahay qofka la dooranayaa inuu cid metelo oo uu
cid wakiil ka yahay. Ninka liisku yuu wakiil ka
yahay? cid ama xisbi uu wakiilka ka yahay midna
ma jiro. Markaa, waxaynu u baahanahay nin la soo
doorto oo cid ka wakiil ah.”
Cabdiqani X. Baynax
Saylac.com / Hargeysa/ Somaliland
|
|
|
