|
|
 |
|
| |
Dagaalo xoogan oo qasaare
Dhimasho iyo Dhawac dhalisay oo Ciidamada Dowlada
TFG-da iyo Kuwa Tirgeega oo isku dhan ah iyo Xoogaga
Maxkamadaha Islaamiga...0ct,06,2008
(Muqdisho:Saylac.Com)-Waxaa gebi ahaanba maanta uu
hakad ku yimid dhaq dhaqaaqii ganacsi ee Suuqa
Degmada Huriwaa, halkaasoo barqanimadii maanta ay is
rasaaseyn ku dhex martay Ciidamada Dowladda TFG-da
iyo kuwa Ethiopia oo isku dhinac ah iyo xoogaga
Maxkamadaha Islaamiga.
Is rasaaseynta oo sababtay dhimasho iyo dhaawac dad
rayid ah ayaa la sheegay inay timid markii ay gudaha
usoo galeen Suuqa Huriwaa Ciidamada Dowladda iyo
kuwa Ethiopia waxaana iska caabin kala hortagay
xoogaga Maxkamadaha islaamiga.
Ciidamada Dowladda TFG-da ayaa la sheegay inay dhac
iyo boob u geysteen Goobo ganacsi oo ku yaala Suuqa
Huriwaa xiliga uu dhamaaday iska hor imaadka,
waxaana Ciidamada ay jabsadeen Dukaamo kala duwan
kuwaasi oo alaabo ganacsi ay kala soo baxeen.
Dagaalkani oo socday qadar Daqiiqado ah ayaa waxaa
uu dhaliyay Geerida 1-qof oo haween ah iyo dhawaca
5-ruux oo rayid ah kuwaasi oo rasaasta ay ugu tagtay
gobo ka baxsan halka lagu dagalamayay.
Afhayeenka dhanka howlagalada xoogaga Maxkamadaha
Islaamiga ee dhanka Howlagalada Shiikh C/raxiin
Ciise Cadoow oo shabelle uu waramayay ayaa sheegay
in dagalkaasi ay iyagu ka danbeeyeen isla markana ay
illaa 8-madfac ay ku rideen goobta ay ciidamada
dowlada iyo kuwa Ethiopia ay ku sugnaayeen isla
markana u ka soo gaaray qasaare ayna awoodi waayeen
in ay iska caabiyaan xoogaga Maxkamadaha.
Shiikha ayaa sheegay in wax dhibaato ah uusan ka soo
gaarin wax dhibaato ah waxana uu faray dadka ay
dhibaatada u geysteen ciidamada iskaashanaya in ay
sabirka kaashadaan
Dadka deegaanka ayaa soo sheegaya in sidoo kale uu
iska hor imaad xoogan uu goor dhoweyd ka dhacay
Warshadii Xeyla Bariise oo ay fariisin ku leeyihiin
Ciidamada Dowladda iyo kuwa Ethiopia, waxaana
halkaas Kooxaha Hubeysan ku weerareen Gantaalada
garabka laga rido iyo qoryaha fud fudud.
Wafdi Caalami ah oo ka socda Qaramada Midoobey oo
maanta ka soo degay Garoonka Diyaaradaha Magaalada
Jowhar. .0ct,06,2008
(Jowharo:Saylac.Com)-Wafdi ballaaran oo ka socda
Qaramada Midoobey ayaa maanta ka degay Garoonka
Diyaaradaha Magaalada Jowhar, waxaana wafdigan ay
kulamo kula qaateen Magaalada Jowhar Maamulka
Midowga Maxkamadaha ee Gobolka Sh/Dhexe.
Wafdigan oo ka kooban Lix Xubnood ayaa waxaa
horkacayay Christian Balslev oo ah Madaxa UNICEF
Soomaaliya, waxaana ay kulamo kula yeesheen
Magaalada Jowhar Saraakiil ka socotay Hey'adaha Sama
Falka iyo Mas'uuliyiinta Midowga Maxkamadaha.
Madaxa UNICEF ee Soomaaliya Mr Christian Balslev
ayaa ugu mahadceliyay Maamulka Maxkamadaha sida
wanaagsan ee ay u sugeen amaanka Magaalada iyo guud
ahaan Gobolka, isagoona ka codsaday inay la
shaqeeyaan Qaramada Midoobey.
Gudoomiyaha Maxkamadaha Islaamka ee Magaalada Jowhar
Sheekh Daahir Caddow Calasow ayaa sheegay inay soo
dhoweynayaan Hey'adaha Qaramada Midoobey, isagoona
ugu baaqay inay ka qeyb qaataan horumarinta Gobolka
Shabellaha Dhexe.
Shiikh Daahir Cadoow Calsoow waxaa sidoo kale uu
sheegay in ay ka wada hadleen labo arimood oo ay ugu
muhiimsan tahay sugida ammaanka Shaqaalaha QM iyo
sidii shaqaalahaasi ay adeegyada u hayaan Bulshada
ay halkasi uga fulin lahaayeen halkaasi.
Wafdigan ayaa ah kii u horeeyay ee ugu sareeya ee
soo gaara Magaalada Jowhar tan iyo markii horaantii
sanadkan ay Magaaladaas la wareegeen Kooxaha
Maxkamadaha islaamka, waxaana Wafdigan uu isla
maanta dib uu ugu laabtay Magaalada Nairobi oo
markii hore ay ka yimaadeen
Wafdigan ayaa noqonaya kii labaad oo Magaalada soo
gaaray, waxaana muddo labo bilood ka hor Magaalada
soo gaaray Wafdi ka socda Laamaha Ammaanka Qaramada
Midoobey, kuwaasoo u kuur galayay xaaladaha amaan ee
gobolka.
Hay'ada Xuquuqul Aadan Human Rights Watch oo
sheegtay in dagaaladii ugu dembeeyay ay ku
barakaceen dad rayid ah isla markana lagu burburiyay
Magaalada Muqdisho. .0ct,06,2008
(Muqdisho:Saylac.Com)-Hay'ada Xuquuqul aadanaha ee
Human Rights Watch ayaa waxa ay sheegtay in
dagaaladii ugu dembeeyay ee ka dhacay gudaha
magaalada Muqdisho lagu bur buriyay magaalada
islamar ahaantaana lagu barakiciyay dad rayid ah.
Hay'adda Human Rights Watch ayaa war bixinta ay soo
saarty waxa ay ku sheegtay in dagaaladii ugu
dembeeyay ee ka dhacay gudaha magalada Muqdisho ay
wax yeeleen dad rayid ah balse hay'ada ma sheegin
tirada dadka ee ku wax yeeloobay dagaaladii ugu
dembeeyay ee ka dhacay Gudaha Caasimada Soomaaliya
ee Muqdisho.
Human Rights Watch ayaa sheegtay in caalamka uu la
yaaban yahay xaalada Muqdisho oo maalinba maalinka
ka dembeya ay ka sii darteyso xaalada Muqdisho
islamarkaana dhinacyada isku haaya Muqdisho looga
baahan yahay in ay ilaaliyaan dadka shacabka ah ee
wax yeelada ay soo gaareyso hardanka u dhexeeya
garabyada isku haya Siyaasada Soomaaliya.
Hay'ada Xuquuqul aadan ayaa sheegtay in habeen kasta
caasimada Muqdisho lagu arko iftiinka madaafiicda
nuucyadeeda kala duwan oo ay is dhaafsanayaan
ciidamada Shisheeye iyo ciidamada Dowlada TFG-da oo
dhinaca ah iyo xoogaga kacdoonka Muqdisho.
Xaaji Abuukar Cumar Cadaan oo ugu baaqay Kooxaha
Islaamiyiinta ee u kala baxay dhowrka firqo inay
midoobaan 0ct,06,2008
(Riyadh:Saylac.Com)-Xaaji Abuukar Cumar Cadaan oo
ahaa maalgeliyihii Maxkamadihii Islaamiga ee ka hana
qaaday Koonfurta iyo Bartamaha Soomaaliya ayaa
markii u horeysay ka hadlay khilaafka Baaxada leh ee
soo kala dhex galay Maxkamadaha Islaamka, taas oo
keentay inay u kala baxaan dhowr firqo oo kala duwan.
Ganacsade Xaaji Abuukar oo ku sugan Dalka
Boqortooyada Sacuudi Carabiya ayaa tilmaamay in wax
laga xumaado ay tahay in Kooxaha Islaamiyiinta ee u
dagaalamaya dalka sidii looga saari lahaa Cadawga
inay xilligan dhowr firqo kala noqdaan,
"Waxaan ka codasanaayaa qolyaha Islaamiyiinta ah ee
u dagaalamaya sidii dalka looga saari lahaa cadawga
inay joojiyaan firqooyinka faraha badan ee ay u kala
baxeen, waxaana u jeedinayaa inay midoobaan si aan
cadowgooda ugu farxin kala jabkeena"ayuu yiri Xaaji
Abuukar Cumar Cadaan oo u waramayay Mid ka mid ah
Idaacadaha Muqdisho.
Xaajiga ayaa sheegay in xilligii Maxkamaduhu ay
heysteen dalka ayna wanaagstahay xaaladda, balse
haatan uu yahay xaalku mid laga naxo, isagoo soo
qaatay dhibaatooyinka faraha badan ee ay ku jiraan
shacabka Soomaaliyeed.
Mar uu ka hadlayay arrimaha Shirka Dib u
Heshiisiinta Dowladda iyo Isbaheysiga Dib u Xoreynta
ayaa wuxuu sheegay inuu taageerayo hadii wanaag lagu
helayo.
Xaaji Abuukar ayaa sidoo kale ku tilmaamay dagaalada
ka socda Muqdisho iyo Gobolada Dalka inay xaq tahay,
isagoo xusay in qaran kasta haddii la soo weeraro ay
waajib tahay inuu is difaaco.
Sidoo kale Xaaji Abuukar Cumar Cadaan waxa uu
sheegay in loo baahan yahay in mar kastaba laga
fekero danta shacabka, wuxuuna sheegay in
xirnaanshaha garoonka diyaaradaha aysan wax dan ah
ugu jirin shacabka.
"Waxaan ka codsanayaa kooxihii xiray garoonka
diyaaradaha inay dib u furan, maadaama ay ku jirto
danaha shacabka" ayuu yiri Xaaji Abuukar Cumar
Cadaan oo sheegay in loo baahan yahay mar kastaba in
laga shaqeeyo danaha shacabka iyo sidii loo ilaalin
lahaa midnimada.
Hadalka Xaajiga oo udub dheexaad u ahaa Nidaamkii
Maxkamadaha Islaamka ee ka hana qaaday dalka ayaa ku
soo beegmaya xilli Gudaha Dalka Soomaaliya ay ka
jiraan Kooxo Islaamiyiin ah oo firqooyin kala duwan
u kala baxay, kuwaasi oo mad madow u dhaxeeya, hase
ahaatee ay isaga mid yihiin dagaalada ay kaga soo
horjeedaan Ciidamada Shisheeye iyo Dowladda TFG-da
Sheekh Shariif oo sheegay in xabad joojinta lagu
gaari karo oo kaliya marka ay ciidamada Ethiopia ka
baxaan dalka Soomaaliya...0ct,06,2008
(Makka:Saylac.Com)-Gudoomiyaha Isbaheysiga Dib u
Xoreynta Garabka Jabuuti Sheekh Shariif Sheekh Axmed
oo socdaal ku jooga Dalka Boqortooyada Sacuudi
Carabiya ayaa ka hadlay halka uu marayo Wada
hadalada Dowladda iyo Isbaheysigiisa u socda,
waxaana uu sheikha cadeeyay inaan wali la gaarin
xabad joojin buuxda.
Sheekh Shariif oo Dalka Boqortooyada Sacuudi
Carabiya u jooga gudashada Waajibaadka Cumrada ayaa
tilmaamay in meel wanaagsan uu marayo wada hadalada
Jabuuti ee ay garwadeenka ka tahay Qaramada Midoobey.
"Aragtida Isbaheysiga Markii hore wuxuu ahaa Xoog
iyo Wada hadalba, hada wada hadalba baa socda,
laakiin wali Xabad joojin buuxda lama gaarin"ayuu
yiri Sheekh Shariif oo intaa ku daray in markii hore
ay ahaayeen awood maquunin, haatanse markii ay
dhibaatadu sii daba dheeraatay ay doonayaan in wada
hadal la bilaabo.
Waxaa uu sheegay Shariifka in Xabad joojinta lagu
gaari karo is faham dhex mara Gudiyada Ammaanka ee
Isbaheysiga iyo Dowladda, waxaana uu tibaaxay in
xabad joojinta ay suura geli karto markii ay iyana
baxaan Ciidamada Ethiopia eek u sugan guda dalka
Soomaaliya.
Sheekh Shariif oo hadaladiisa laga dheehanayay is
bedel dhinaca mowqifka kadib markii uu horay u
sheegi jiray in xabad joojin la gaaray, waxaana uu
hadalkiisa u muuqdaa mid cadeynaya in heshiisyadii
ay horay u kala saxiixdeen Dowladda TFG-da iyo
Isbaheysigiisa uu yahay mid aan dhameystirneyn.
Max'ed Ibraahin Raage
Saylac.com Muqdisho Somalia
|
|
|
