|
|
 |
|
| |
Silaanyo waxa uu noqday
jiirkii intuu ku qaniino hadana farta kaa afuufayey.0ct,03,2008
London(Saylac.com) Ma isweydiisay waxa ka
cadhaysiiyey garabka xisbiga kulmiye ee qaadacay
shirkii Burco? Waxa laga yabaa inaad is weydiisay
lakiin aanad helin jawaabta dhabta ah ee khilaafkaa
sababtey oo ah khaladaad aan loo aabo yeelin oo si
idaba jooga a uu ugu kacay Axmed Maxamed Maxamuud
Siilaanyo mudadii lagu gudo jiray shirweynaha
xisbiga ee magaalada Burco.
Khaladaadkan ayaa sida la wada ogsoon yahay waxa uu
bilawday waxyar ka hor shirweynihii kobaad ee
xisbiga kulmiye ku yeeshay magaalada Hargeysa oo
runtii dadka badankiisu ay islahaayeen qabsoomi
maayo lakiin xaga Eebe iyo Siyaasiinta culculus ee
hada Axmed Siilaanyo uu eedaynayo ay badbaadiyeen
iyagoo waxwalba ka doorbiday in shirkaasi qabsoomo
cadawda xisbiga kulmiyena ku quusto.
Cadawgaasi runtii muu quusan waayo marka horeba ma
ahayn cadaw dibada uga yimid xisbiga kulmiye ee waxa
uu ahaa mid hogaamiyaha xisbiga kulmiye Axmed
Maxamed M Silaanyo uu jeebka ku sitey isla markaana
kolba intuu doono uu kala soo baxaayey kuna dhex
tuuraayey Siyaasiinta culculus ee xisbiga dadaalka
dheeraadka ah u soo qabtey .
Axmed Maxamed Maxamuud Siilaanyo wuxuu is door biday
inuu sidii madaxweyne oo kale uu yahay waxanu
bilaabay inuu kala doorto xubnaha sarsare ee xisbiga
kulmiye isagoo sida la sheegay ku balan qaaday inuu
dhamaanba silsilada hogaanka xisbiga kulmiye bedeli
doono rag isaga ka amar qaatana u magacaabi doono.
Taa waxa markhaati cad ka ah sidii uu afkiisa uga
sheegay shirarkaa labada ah mudadii ay socdeen oo ah
hadalk uu ku celceliyey ahaana inaan cidina isaga
kula tartami karin jagada madaxweynenimada xisbiga
kulmiye.
Intaa waxa u dheerayd inuu gooni gooni ula shiro
masuuliyiinta xisbiga kulmiye kula jira isagoo kala
xadaaya qaarba wax gaar ahna ugu sheekaynaaya sidii
ninkii afarta naagood lahaa ee sii jeeska ku yidhi
midaan jecelahay anigaa dhabarka taabane dabadeedna
dhamaantoodba dhabarka wada taabtey ee waliba u
raaciyey midayna inaan adiga dhabarka ku taabtay
inta kale ha u sheegin.
Hadaba dhabartaabadkaa raga qaarkii weydiideen waana
sababta keentay inay shirkii Burco isaga dareeraan
cadaalad daro uu laaqday Axmed Maxamed Maxamuud
Siilaanyo aawadeed.
Waxa intaa ka wada daran dadka beenta cad loo
dhoodhoobo maalinwalba in doorasho xalaal ahi ka
dhacday Burco iyo waliba in jagada Madaxweyne ee
xisbiga kulmiye lagu loolamay oo labaduna ah been
aan geed iyo yacaytoona loogu soo gaban oo dadka
lagu marin habaabinayo -- waayo waa kuma ninka la
tartamay Axmed Maxamed Maxamuud Siilaanyo? Waa ayase
raga kale ee la tartamay Cabdiraxman Saylaci mar
hadii ay shirka ka baxeen ragii la loolami lahaa?
Maxaase ergo looga daba diri waayey siyaasiinta
cadhootey si looga wadahadlo khilaafka loona xaliyo
intey fartu gaadhayso? waa khidad lagu waday in
marka shirka ay ka baxaan codayn cimaamadan loo saar
Cabdiraxman Saylaci oo uu Axmed Maxamed Maxamuud
Siilaanyo ka cunay lacag lagu qiyaasay $100,000 oo
qurbo jooga reer Awdal ee tageersan Cabdiraxman
Saylaci ay ka soo ururiyeen dibadaha waana marag ma
doonto cidwaliba ogtahay in Siilaanyo lacagtaa
jeebka ku shubtey cidwalba oo degan gobolka Awdalna
sabi iyo ciroole way la socotaa kharashkaa buuran ee
jeebka Siilaanyo ku dhacay!
Hadaba dadka beenta qaawan marwalna ku eedaynaya
Cabdiraxman Aw-Cali iyo mujaahidiinta kale ee sida
raganimada leh ugu gacan saydhay khaladka Axmed
Maxamed Maxamuud Siilaanyo farahiisa iyo lugahiisaba
ku laaqayo si uu xisbiga kulmiye ikhtiyaarkii ugu
tagri falo, miyeyna inaba garanayn inaan umada
soomaliland ka iibsanayn fikirkooda khaldan ee ay ku
taageerayaan hogaamiyaha daalay ee siyaasada iyo
danaysiga shaqsigu igaga laaqmay ee kulmiye.
Runtii ree Burco dariiqay socdaani waa mid awalba
lagu yiqiin inayna is qaban khalad iyo saxba waana
dabeecad khaldan inaad qabiil ku taageertid
walaalkaa oo khaldan meela idin gaadhsiin mayso. Bal
waxaad isweydiisaa ninkan Siilaanyo ee hada boqolka
khalad iyo khilaaf ka dhex abuuray xisbiga kulmiye
haduu wadanka hogaankiisa qabto sideebuu ka yeeli
doonaa umadan somaliland ee walaalaha ah ? waa arin
iska cad inuu odhan doono sii wada jeesta intaan
jecelahay anigaa dhabarka taabane lakiin Ilaahayba
inooma dhiibo taladiisa. Amiin.
Waxaan ku soo gaabinayanayaa qormadan faalada ah
khaladka khilaaf kasta oo xisbiga kulmiye ku dhacay
waxa aabo iyo hooyo labada ka ah Axmed Maxmed
Maxamuud Siilaanyo ilaa isagu ka fadhiisto hogaanka
xisbigana laba shay oo iskugu hagaagaya xisbigu ma
jiro mana jiri doono.
Cabdiraxman Aw Cali iyo Mujaahid Dhegaweyne labaduna
waxay mudan yihiin amaan sida raganimada leh ee ay
gashaanka ugu dhufteen rayiga diciifka ah ee
siilaanyo wato oo ah in daba dhilif loo noqdo isla
markaana diiday in rayi ama talo kale lagu darsado
habsami u socodka xisbiga kulmiye.
Hadaba waxaan eegi doonaa halaka ay gaadhsiiso Axmed
Maxamed M. Silaanyo kaligii taliyanimada iyo
macangagnimada uu la soo shaac baxay intuba.
Maxamaed Haji
Saylac.com
London, UK |
|
|
