Daawo:Munaasibada 65-sano guurada Aas Aasan Ciidanka Booliiska Soomaaliyeed
oo maanta lagu qabtay iyo Munaasibadaasi oo Madaafiic lagu soo
dhaweeyay...Dec,20,,2008

(Muqdisho:Saylac.Com)-Munaasibad lagu weyneeynayay 65-sano guuradii ka
soo wareegtay Maalinta dhidibda loo taagay Ciidamada Booliiska
Soomaaliyeed oo ku beegan 20-ka December ayaa maanta lagu qabtay
School Police ee magaalada Muqdisho.

Xafladani oo ay ka soo qeyb galeen Qaar ka mid ah xildhibaanada
Dowlada TFG-da iyo Wasiirada dowladaasi iyo qeybaha kala duwan ee
saraakiisha ciidamada dowlada Ebighati ayaa maanta waxa lagu qabtay
Barxada weyn ee dugsiga Tababrka Ciidamada Booliiska ee magaalada
Muqdisho.

Ciidamo gaaraya illaa 58-cutub oo Qeybaha kala duwan ee Ciidamada
Booliska Soomaaliyeed sida Daraawiishta,Taraafikada,Bando Musico iyo
Ciidamada kale ee Booliska iyo weliba Kooxda kubadda Kolayga ee Heegan
wiilashooda iyo Gabdhahaba ayaa waxaa ay maanta Gaado ka cayaar dib u
xasuusiyay waayo waayo dadkii u soo daawasho tagay ay ku soo
bandhigeen Garoonka Dugisga Tababarka Ciidanka Booliiska ee magaalada
Muqdisho.

Guud ahaan waxaa aad loo adkeeyay ammaanka agagaarka halka uu ku yaal
dugisgaasi ee degmada Xamar Jab Jab waxana ciidamada dowlada qebeheeda
kala duwan ay isku gadaameen taasi oo hakad galisay isku socodka dadka
iyo gaadiidk.

Iyadoo la marayo xiligii ugu danbeeysay ee munaasibadaasi ayaa Weeraro
loo adeegsaday Madaafiic hoobiye yaal ah lagu garaacay Xarunta
Tababarka Booliiska oo ay ka socotay Munaasibad loogu dabaal degayay
65-sano guuradii ka soo wareegtay maalinta la aas aasay ciidanka
Booliiska Soomaaliyeed.


Mid ka mid ah hoobiyaashaasi oo ku soo aaday daqiiqadihii ugu
danbeeyay Xaflada oo ay madaxda qaarkood taagnaayeen ilinka hore ee
hoolka ayaa waxaa uu ku soo dhacay Bartamaha Xerada in kasatoo uusan
jirin wax qasaare ah oo uu geystay halkaasi oo uu ka dhashay buuq iyo
Isjiir ay sameeyeen madaxada dowlada iyo ilaaladii ay wateen .

Sidoo kale illaa 2-hoobiye  ayaa iyana ku soo dhacay meel aan ka
dheereeyn dugsiga Tabaarka Booliiska,waxana hakad galay dabaal degii
munaasibadaasi oo ay wax yar ka harsaneeyd.

Weerarka u muuqday in lagu carqaladeeynayya Munaasibada ay ciidamada
Booliiska ugu dabaaldegayeen sanadguuradooda ayaa waxaa sheegtay
Masuuliyada weerarkasi Urur diimeedka  Al shabaab .

Xaflada oo ay weerarka ka hor ay ka hadleen masuuliyiinta sar sare ee
dowlada kmg Sida wasiirka arimaha gudaha,kan gaashaan dhiga iyo
gudoomiyaha gobolka Banaadir ayaa waxaa intooda badan ay ka hadleen
qiimaha ay leedahay munaasibada Taariiqda Booliiska.

 Taliyaha Ciidanka Booliiska Soomaaliyeed General Cabdi Xasan Cawaale
Qeybdiid oo munaasibada ka hor aqrinayay wax qabadka ciidanka
booliiska ayaa waxaa uu sheegay in kooxaha ka soo hor jeeda dowlada ay
inta badan  gobolada dalka ka cuuryaamiyeen howlihii uu ciidanku ka
qaban lahaa.

Maalintani ku beegan Sanadguurada ka soo wareegtay 65-sano guurada
ciidanka Booliska Soomaaliyeed ay ku soo beegmeeysaa xili ciidamada
booliiska dowlada embighti lagu eedeeyo in ay dhac iyo Dil bareer ah
ay kula dhaqaaqaan shacabka Soomaaliyeed ee la daala dhacaya dagaalada
aan joogsiga leheyn tiiyoo ay u wehliso Dhibaato dhanka nolosha ah.


Dagaal faraha looga gubtay oo xalay ka dhacay qeybo ka mid ah Muqdisho
iyo duqeyn loo geystay Bakaaraha

(Muqdisho:Saylac.Com)-Dagaal xoogan oo muddo socday ayaa xalay
abaarihii 9-kii fiidnimo waxaa uu ka qarxay qeybo ka mid ah Degmada
Wardhiigley iyo nawaaxiga Suuqa Bakaaraha, halkaasoo ay isku fara
saareen Ciidamada Dowladda  TFG-da iyo Xoogaga ka soo horjeeda.

Dagaalkan ayaa bilowday markii Xoogaga Kacdoonka ay weerareen
saldhigyo Ciidamada Dowladda ay ilaalo kaga hayaan xarunta
Madaxtooyada, waxana halkaas ka dhacay dagaal faraha looga gubtay.

Hugunka iyo Iftiinka ka baxayay Madaafiicdii la isku  adeegsanayay
ayaa ahaa mid Magaalada oo idil laga wada arkayay, waxaana uu ahaa
dagaal faraha looga gubtay oo muddo ku dhow 30-saac ah socday.

Dagaalkan ayaa waxaa dhinaca socday Madaafiic lala beegsanayay
deegaano uu ka mid yahay Suuqa Bakaaraha halkaas oo dhowr Madfaac lala
beegsaday kuwaasi oo dhaliyay qasare nafeed iyo mid hantiyeed oo soo
gaaray dad shacab ah .

Afhayeen u hadlay Xoogaga Raaskambooni oo uu hogaamiyo Sheekh Xasan
Turki ayaa sheegtay dagaalkaas inay iyagu ka dambeeyeen, isla markaana
ay weeraro dhowr jiho ugu qaadeen Xarunta Madaxtooyada.

Inta la hubo dagaalkan ayaa sababay dhimashada hal ruux iyo dhaawaca
8-kale oo ahaa dad rayid ah, kuwaasoo gaartay madaafiicda habowga ah
ee la is dhaafsanayay, kaasoo ahaa mid qal qal iyo cabsi ku reebay
dadka ku dhaqan Suuqa Bakaaraha oo xalay maciin biday daaraha shubka,
kadib markii ay ka carareen Hoygooda.

Afhayeenka Ciidamada Milateriga Daahir Maxamed Xirsi ayaa beeniyay
inay Madaafiic ku bartilmaameedsadeen Suuqa Bakaaraha,  kaliya waxaa
uu sheegay in ay adeegsadeen Qoriga loo yaqaan 37- ee lidka
diyaaradaha, kaasoo laftiisa ah midka wax gumaada.

Dagaalkan ayaa ku soo aadaya xilli labo todobaad ay ka harsan tahay
waqtigii ay Dowladda Ethiopia sheegtay inay Ciidamadeeda kala baxeysa,
kaasoo ah dhamaadka sanadkan.


Ninkii dilay Sarkaalkii Maxkamadaha ee garabka Jabuuti oo gacanta lagu
soo dhigay.

(Baladweyne:Saylac.Com)-Sida ay sheegayaan wararka ka imaanaya
Magaalada Baladweyne oo labadii maalmood ee la soo dhaafay ay ka
jirtay xiisad sababay gacan ka hadal ayaa sheegaya in gacanta lagu soo
dhigay Ninkii dilay Sarkaalkii Maxkamadaha ee garabka Jabuuti.

Wararka ayaa sheegaya in Saraakiil ka tirsan Maxkamadaha ee Gobolka
Hiiraan ay u suura gashay inay soo qabtaan Ninkaas oo markii hore ka
tirsanaa Ciidamada Maxkamadaha, isla markaana sabab u ahaa isku dhacii
maalmahan ku dhex maray Ciidamada Maxkamadaha dhexdooda.

Saraakiisha Maxkamadaha ee Gobolka ku sugan ayaa sheegay in ninkan
laga soo qabtay Degmada Tiyeeglow ee Gobolka Bakool, waxaana ay
tilmaameen in ay shareecada marsiin doonaan.

Ninkan oo aan magaciisa la shaacin ayaa ka dambeeyay dilka Taliyihii
Saldhiga Cilm Maxamed Maalin iyo nin kale oo darwal ahaa, sida la
sheegay uu rasaas ku furay markii ay murmeen Labo ciidan oo
Maxkamadaha ka kala tirsanaa.

Magaalada Baladweyn oo labadii maalmood la soo dhaafay labo u
qeybsantay, isla markaana ay isku rasaaseeyay Ciidamo ka wada tirsan
Maxkamadaha, balse labo fikir siyaasadeed kala wata, isla markaana
kala taabacsan garabyada Jabuuti iyo Asmara ayaa shalay la dhex dhigay
heshiis xabad joojin ah

Max'ed Ibraahin Raage
Saylac.Com Muqdisho Somalia.